НУРАНГИ ДОРООС ХОЁР ХҮҮХЭД, ЭХИЙН ЦОГЦСЫГ ГАРГАЛАА

Магнитогорск хотын сууцны байшингийн нуранги дороос хоёр хүүхэд, эхийн цогцсыг гаргалаа гэж Оросын Онцгой байдлын алба өчигдөр орой мэдээллэв. Мөн түүнчилэн эмэгтэй, эрэгтэй хүний үлдэгдэл ч олджээ. Ийн амь үрэгдэгсдийн тоо одоогоор 33 хүрлээ. Үүнээс өмнө зургаан хүүхдийн цогцос гаргасан бөгөөд тэдний хоёр нь хүү, дөрөв охин байсан юм. Есөн хүн хэрхсэн нь тодорхой бус хэвээр байна. Нурангийг зайлуулах ажил өдөр, шөнө тасралтгүй үргэлжилж байна. Нэгдүгээр сарын 01-нд аврагчид 10 сартай амьд хүү олсон юм. Бие нь тун дор орсон хүүг тэр өдөрт нь Москвагийн Леонид Рошалийн нэрэмжит хүүхдийн мэс заслын эмнэлэгт хүргэсэн билээ.

Магнитогорск хотын Карл Марксын нэрэмжит гудамжны сууцны байшингийн орц 2018 оны 12 дугаар сарын 31-ний өглөө нурсан юм. Ахуйн хий дэлбэрснээс үүдэлтэй болов уу гэдэг таамаг голлож байгаа. Тэр өдөртөө ОХУ-ын ерөнхийлөгч Владимир Путин Магнитогоск хотод очсон. 2019 оны нэгдүгээр сарын 02-нд Челябинск муж эмгэнэл зарласан билээ.