ДАРС УУЖ ХОРДЛОГОД ОРСОН ГУРВАН НАСТАЙ ХҮҮХДИЙН ЭЭЖИЙГ 300 МЯНГАН ТӨГРӨГӨӨР ТОРГОЖЭЭ

Тодруулбал, энэ сарын 29-ны өдөр Баянзүрх дүүргийн 22-р хорооны Алтан-Өлгийн тоотод оршин суух эмэгтэй өөрийн төрсөн гурван настай Х гэх охины ам руу их хэмжээний дарс ам цутгасан гэх мэдээлэл ирсэн юм.

Согтууруулах ундааны зүйл ам руу нь цутгасны улмаас охины бие муу, ухаангүй байдалтай Яаралтай түргэн тусламжаар Баянзүрх дүүргийн эмнэлэгт хүргэгджээ. Тус эмнэлэгт согтууруулах ундааны зүйл хэрэглэсэн гэх охин хүргэгдэж очсон даруйд эмч нар үзлэг хийхэд ямар нэгэн хариу үйлдэл үзүүлэх боломжгүй, ухаангүй байсан гэх. Охиныг төрсөн аав нь эмнэлгийн машинтай хүргэж очсон бөгөөд мөн л согтууруулах ундааны зүйл хэрэглэсэн байсан аж.

Энэ дагуу цагдаагийн хэлтсийн жижүүрийн бүрэлдэхүүн шалгахад иргэн Г, Л нарын гурван настай хүүхэд хажуу айлынхаа хүний төрсөн өдрийг тэмдэглэх үедээ ууж байгаад орхисон улаан дарсны үлдэгдлийг ууснаас болж хордлогод орж эмнэлэгт хүргэгдэн эмчлэгдсэн аж.

Эрүүл мэндийн байгууллагаас мэдээлж байгаагаар хүүхдийн хордлого тайлагдсан, биеийн байдал хэвийн болсон тул эмнэлгээс гаргасан байна. Харин хүүхдийн ээж Л-ийг Зөрчлийн тухай хуульд зааснаар арга хэмжээ авжээ. Тус хуулийн 6.20 дугаар зүйлийн 9 дэх хэсэгт "Хүүхдийн бие мах бодит халдсан, эсхүл үл хайхарсан, эсхүл хүүхдийн дэргэд архидан согтуурсан, мансуурсан, хүчирхийлэл үйлдсэн нь Эрүүгийн хариуцлага хүлээлгэхээргүй бол хүнийг 300 нэгжтэй тэнцэх хэмжээний төгрөгөөр торгоно" гэж заасны дагуу хүүхдийн ээжийг 300,000 төгрөгөөр торгож, хууль зүйн зөвлөгөө өгсөн байна.

Үүнтэй холбогдуулан цагдаагийн байгууллагаас хүүхдийнхээ дэргэд баяр ёслолыг архи, согтууруулах ундаагүй тэмдэглэж байхыг уриалав.