ХАР ТАМХИНД ДОНТОГСОДЫН ИХЭНХИ НЬ ЭМЭГТЭЙЧҮҮД БАЙНА

Сүүлийн жилүүдэд мансууруулах эм, сэтгэцэд нөлөөлөх бодис хэрэглэгчдийн тоо өсч байгаагаас гадна насны хувьд эрс залуужиж байгааг албаны хүмүүс хэлж байгаа юм. Тухайлбал, энэ төрлийн гэмт хэрэгт Эрүүгийн цагдаагийн албаны Хар тамхитай тэмцэх газарт бүртгэгдсэн мэдээллийг авч үзэхэд 2018 оны арван сарын байдлаар 162 хэрэгт 312 хүн шалгагджээ. Уг гэмт хэрэгт холбогдогчийн тоонд насанд хүрээгүй хүүхдүүд ч байгаа юм.

Сүүлийн гурван жилийн судалгаагаар бүрэн болон бүрэн бус боловсролтой иргэд дийлэнх хувийг үйлджээ. Энэ төрлийн гэмт хэрэг үйлддэг гол шалтгааны нэг нь ажилгүйдэл болж байна. Богино хугацаанд амар хялбар аргаар мөнгө олох зорилгоос болж гэмт хэрэгтэн болох тохиолдол цөөнгүй байдаг аж. Насны хувьд 2016 онд нийт гэмт хэрэгт холбогдож шалгагдсан хүмүүсийн 50-иас дээш хувь нь 19-25 насны залуус байжээ. Гэтэл 2017 онд 26-35 насны залуус нийт холбогдсон хүмүүсийн 51 хувийг эзэлсэн. 2018 оны эхний арван сарын байдлаар энэ төрлийн гэмт хэрэгт холбогдсон 46 хувийг 19-25 насны 37 хувь нь 26-35 насны хүмүүс эзэллээ. Өөрөөр хэлбэл дийлэнх хувийг 19-25 насны залуус эзэлж байна. Сүүлийн үед ЕБС-ын хүүхдүүд энэ гэмт хэрэгт холбогдох боллоо. Энэ төрлийн гэмт хэрэгт хамгийн залуу холбогдогч нь 13 настай хүүхэд байсан байна.