ШУГАМ СҮЛЖЭЭГ ШУУДУУ УХАЛГҮЙ ШИНЭЧЛЭН ЗАСВАРЛАХ АЖЛЫГ ЭХЛҮҮЛЛЭЭ

Австри улсын Засгийн газрын 7 сая ёврогийн хөнгөлөлттэй зээлээр Шугам сүлжээг шуудуу ухалгүйгээр шинэчлэн засварлах төслийн ажлыг Монгол улсад анх удаа нэвтрүүлж байна. Улаанбаатар хотын цэвэр усны шугам сүлжээг анх 1959 онд ашиглалтад оруулсан байдаг. Одоогийн байдлаар ус хангамж, ариутгах татуургын 856,5 км шугам сүлжээ байна. Жар шахам жил болсон шугам сүлжээ өнөөдөр элэгдэлд орж, хуучирч муудсанаар гэмтэл саатал ихээр гарч сэргээн засварлах шаардлага зүй ёсоор тулгарч байна. Улаанбаатар хотын хэмжээнд цэвэр усны 619 км шугам сүлжээ байдгаас:

310 км нь ган

18 км нь шилээр хүчитгэсэн хуванцар

251 км нь хуванцар

40 км нь ширмэн материалаар хийгдсэн байдаг байна.

Австри улсын RTI компани нь машин механизм, тоног төхөөрөмж, шугам доторлох багаж хэрэгсэл, матриал зэргийг ханган нийлүүллээ. Уг төслөөр эхний ээлжинд Сүхбаатар дүүргийн 1-р Сөүлийн гудамжны хамгийн өндөр насжилттай одоогоос 55 жилийн өмнө тавигдсан 1,7 км орчим цэвэр усны ширмэн шугамыг доторлож сэргээн засварлах юм байна. Цаашид Ус сувгийн удирдах газар нь шугам доторлох дэвшилтэт техник технологийг нутагшуулан өөрсдийн хүчээр дээрэх машин механизм, тоног төхөөрөмжийг ашиглан Улаанбаатар хотын цэвэр усны гол шугам сүлжээг доторлох ажлыг үе шаттай хийх юм байна.