ТУЖИЙН НАРСАНД 10 МЕТР ӨНДӨР ЦАМХАГ БАЙГУУЛЖЭЭ

Сэлэнгэ аймгийн Тужийн нарсны тусгай хамгаалалтын ойд БНСУ-ын "Юүхан Кимберли" компани 10 м өндөр, 6 м урт, 5 м өргөн, нийт 144м2 талбай бүхий цамхаг байгуулжээ. Ингэснээр нарсан ойг бүхэлд нь харж, байгаль экологитой танилцах боломжтой бүрдэж байгаа аж.

Сэлэнгэ аймгийн Алтанбулаг, Сүхбаатар, Шаамар сумдын нутаг дамнан оршдог экосистемийн тэнцвэрт байдлыг хадгалах ач холбогдолтой байгалийн өвөрмөц тогтоц бүхий түүхэн дурсгалт газар бол Тужийн нарс. 1986-2002 онуудад Тужийн нарсанд 7 удаагийн их хэмжээний түймэр гарахын зэрэгцээ иргэдийн эмх замбараагүй ашиглалтын нөлөөгөөр 70 орчим хувь нь устсан гашуун түүхтэй.

2001 оноос эхлэн Улсын болон орон нутгийн хөрөнгө оруулалтыг Тужийн нарсыг нөхөн сэргээх үйл ажиллагаанд төвлөрүүлж ажилласнаар 10088,65 га ой нөхөн сэргээд буй юм байна. 2003 оноос БНСУ-ын "Юүхан Кимберли" компани, Зүүн Хойд Азийн Ойн форум хамтран ойг нөхөн сэргээх ажлыг эхлүүлж 3250 га талбайг нөхөн сэргээсэн нь нийт талбайн 32,3 хувийг эзэлж байгаа аж.

Нарсыг бүхэлд нь харах Цамхагийн нээлт өчигдөр/09.04/ болж, аймаг орон нутгийн удирдлагууд, БОАЖЯ-ны төлөөлөл, БНСУ-ын хөрөнгө оруулагчид, Сүхбаатар сумын ерөнхий боловсролын сургуулийн захирлууд, сурагчдын төлөөлөл оролцжээ. Энэхүү цамхагийг хүүхэд багачуудад таримал ой, түүний арчилгааг таниулах, экологийн боловсрол олгох, цаашлаад жуулчдын очих дуртай газар болгох зорилгоор барьсан байна.