ХОТ ХООРОНДЫН ЗОРЧИГЧ ТЭЭВРИЙН ҮНЭ 12 МЯНГА ХҮРТЭЛ ТӨГРӨГӨӨР НЭМЭГДЖЭЭ

Өнөөдөр буюу есдүгээр сарын 1-ний өдрийн 00:00 цагаас эхлэн хот хоорондын зорчигч тээвэр нэмэгдсэн үнэ тарифаар иргэдэд үйлчилнэ. Тодруулбал, "Авто тээврийн үндэсний төв" ТӨУҮГ-аас хот хоорондын зорчигч тээврийн үнийг тодорхой хэмжээгээр нэмэхээр шийдвэрлэсэн. Ийнхүү үнээ нэмэх болсон шалтгаанаа тэд шатахууны үнийн нэмэгдэлтэй холбон тайлбарласан юм.

Үнэ нэмэх шаардлагыг "Хот хоорондын тээвэр эрхлэгчдийн холбооныхон" санаачлан гаргаж, наймдугаар сарын 9-ний өдөр хэвлэлийн хурал зарласан. Тус холбоонд нийт 72 чиглэлд тээврийн үйлчилгээ эрхлэгч 50 орчим аж ахуйн нэгжийн 1500 гаруй жолооч хамрагддаг байна. Тэд үнэ нэмэх албан шаардлагаа ЗТХЯ болон Авто тээврийн үндэсний төвд наймдугаар сарын 7-ны өдөр 40 гаруй аж ахуй нэгжийн төлөөллүүдийн гарын үсгийг хавсарган хүргүүлсэн байдаг.

Тэд гаргасан шаардлагадаа "Шатахууны үнийн өсөлт бүрийг дагаад өргөн хэрэглээний барааны үнэ өссөөр ирсэн ч тээвэрчид иргэдийн нуруунд ачаа болохгүй байх үүднээс зорчигч тээврийн тарифыг сүүлийн арван жил нэмэгдүүлэлгүй өдий хүрсэн. Үйлчилгээний үнийг чиглэлээс нь хамаарч 1000-8000 төгрөгөөр нэмэгдүүлэхийг тусгасан байна. Гэтэл шатахууны ханш 2.5-3 дахин нэмэгдсэн. Үүнээс болж алдагдалтай ажиллаж байна" гэсэн. Шаардлагыг хүлээн авч, шийдвэрлэхгүй бол тэмцлийн дараагийн хэлбэрт шилжихээ ч мэдэгдэж байв.

Тэдний шаардлагын дагуу зорчигч тээврийн автобус ийнхүү нэмэгдсэн үнэ өртгөөр иргэдэд өнөөдрөөс үйлчилж эхлэх нь. Ингэхдээ 1-12 мянган төгрөгөөр нэмэгджээ. Тодруулбал, хамгийн багадаа буюу 1000 төгрөгөөр Улаанбаатар-Арвайхээр чиглэлд 20-21 мянган төгрөг, Улаанбаатар-Замын-Үүд чиглэлд 35-36 мянган төгрөг, Улаанбаатар-Ар.Эрдэнэмандал 25-26 мянган төгрөг, Улаанбаатар-Төв.Баян сум 4500-5500 төгрөг болон тус тус нэмэгджээ. Харин хамгийн их нэмэгдсэн хоёр чиглэл нь Улаанбаатар-Завханы Тэс чиглэлд 55-67 мянган төгрөг, Улаанбаатар-Ховдын Булган чиглэлд 73-82.5 мянган төгрөг болон өөрчлөгджээ