НИЙТ 619 ӨРХИЙН 16 МЯНГАН ТОЛГОЙ МАЛЫГ ХОТООС ГАРГАЖЭЭ

Нийслэл хотын захын хороод, зуслангийн бүсээр нутагладаг мал бүхий иргэдийг нүүлгэн шилжүүлэх ажил өнгөрсөн оны намраас эхэлсэн. Тус ажлын үр дүн өнөөдөр 97 хувьтай явагдаж байгаа тухай албаныхан мэдээллээ. Тодруулбал, наймдугаар сард төвийн таван дүүрэгт нүүлгэн шилжүүлэлтийн ажил өрнөжээ. Үүний үр дүнд нийслэлийн мал аж ахуй эрхлэхийг хориглосон бүсэд 619 өрхийн 16 мянган толгой мал байсныг нүүлгэн шилжүүлээд байгаа аж.

Хотоос нүүсэн мал бүхий иргэдэд шинэ суурьшлын бүс тогтоон өгч, дэд бүтэц, цахилгаан эрчим хүч, худаг усаар хангаж, хашаа саравчийг нүүлгэх тал дээр дэмжлэг үзүүлсэн байна. Мөн нийслэлийн газрын албанаас мал аж ахуй эрхлэхийг зөвшөөрсөн бүсэд малтай иргэд шинээр суурьших боломжит газрын судалгааг гаргажээ.

Нийт 11 байршилд мал бүхий иргэдийг суурьшуулах боломжтойг судалгаагаар тогтоожээ. Малтай иргэд Баянзүрх дүүргийн 20 дугаар хороо, Сонгинохайрхан дүүргийн 21 дүгээр хороонд шилжин суурьших хүсэлтээ ирүүлсэн байна. Шинэ нутагтай болсон иргэдийн 97 хувь шилжин байрлаад байгаа юм. Түүнчлэн нүүхээс цааргалсан цөөн иргэд үлджээ. Тухайлбал, Чингэлтэй дүүргийн 17 дугаар хорооны иргэн Цэдэвдоржийнх малтайгаа хотоос нүүхээс татгалзсан хариу өгч, хүний эрх зөрчигдлөө гэх шалтгаанаар шүүхэд хандсан тухай холбогдох албаныхан мэдээллээ.

Нүүлгэн шилжүүлэлт хийхээс өмнө:

1.Сүхбаатар дүүрэгт 189 өрхийн 3,000 гаруй

2.Чингэлтэй дүүрэгт 50 өрхийн 1,160

3.Хан Уул дүүрэгт 76 өрхийн 2,400 гаруй

4.Сонгинохайрхан дүүрэгт 221 өрхийн 6,000 гаруй

5.Баянзүрх дүүрэгт 83 өрхийн 3,500 гаруй толгой мал тоологджээ.