БЭЛЭН МӨНГӨӨР ЗОРЧИХ ОРОЛДЛОГО ХИЙСЭН 11 МЯНГАН ИРГЭНИЙГ АВТОБУСНААС БУУЛГАЖЭЭ

Нийслэлийн тээврийн газрын даргын удирдамжийн дагуу нийтийн тээврийн үйлчилгээний хөлс төлөлтийн байдалд хяналт тавих хамтарсан шалгалтыг энэ сарын 20-25-ны өдрүүдэд явуулжээ.

Шалгалтаар зорчигчийн хөлс төлөлтөд хяналт тавьж, хууль дүрэм таниулах мэдээлэл сурталчилгаа хийх, зөвлөмж материал тараах, судалгаа хийх, үйлчилгээний соёлыг дээшлүүлэх, орлогыг нэмэгдүүлэх, автобусны буудлуудад ажиллаж, картаар үйлчлүүлэх мэдээллийг түгээх, илэрсэн зөрчлийг арилгуулахад чиглэсэн байна.

Энэ ажлын хүрээнд Сити Баз Консалтинг ХХК-иас 100 шалгагч, хяналтын ажилтныг 47 автобусны буудал дээр ажиллуулж, нийтийн тээврээр зорчигчдод зөвлөгөө, мэдээлэл өгч ажиллав.

Хамтарсан шалгалтын хүрээнд нийтийн тээврийн хяналтын ажилчид, шалгагч нар 2018 оны 08 дугаар сарын 20-ны өдрөөс эхлэн 25-ны өдрийг дуустал хуваарийн дагуу:

-Энх тайвны өргөн чөлөө 5 шарын буудлаас зүүн 4 замын буудал,

-Зүүн 4 замаас офицеруудын ордон, батоник, цайз 16 зэрэг нийт 60 тээврийн хэрэгслийн зогсоолуудад иргэдэд хууль сурталчлах, зөвлөмж бүхий санамж, зорчигчдод зориулсан товхимол тарааж, бэлэн мөнгөөр зорчуулахгүйгээр зорчигчийн үүргийг танилцуулан ажиллахын зэрэгцээ буудлуудад шугам дундын шалгалт хийж ажилласан байна.

Тав хоногийн турш үргэлжилсэн шалгалтын явцад нийтийн тээврээр зорчиж буй 11.481 зөрчилтэй иргэнийг тээврийн хэрэгслээс буулган, ухаалаг картаар зорчихыг зөвлөж, үлдэгдэл хүрэлцэхгүй байсан смарт картанд 9.820 удаа цэнэглэлт хийж, 9.700 хүнд мэдээлэл өгч, 10.998 хүнд санамж тарааж ажиллажээ.