ХӨДӨЛГӨӨНД ОРОЛЦСОН 8000 ТЭЭВРИЙН ХЭРЭГСЛИЙГ ШАЛГАХАД, 75 ХУВЬ НЬ ДҮРЭМ ЗӨРЧСӨН БАЙЖЭЭ

Өнгөрсөн амралтын өдрүүдэд буюу энэ сарын 25, 26-нд Замын цагдаагийн алба нийт 660 дуудлага хүлээн авч, тээврийн ослын шинжтэй 406 дуудлага авсан байна. Үүнээс ослын улмаас нийслэлд 20 хүн гэмтэж бэртсэний дөрөв нь бага насны хүүхэд байжээ. Харин орон нутагт зургаан хүний амь нас хохирсон байна.

Гудамж замын хяналт шалгалтаар алба хаагчид нийт 8000 гаруй тээврийн хэрэгсэл шалгаснаас 6000 орчим тээврийн хэрэгсэл нь замын хөдөлгөөний дүрэм зөрчжээ. Мөн согтууруулах ундааны зүйл хэрэглэсэн үедээ тээврийн хэрэгсэл жолоодсон 156 зөрчлийг илрүүлэн саатуулж хуулийн дагуу хариуцлага тооцсон байна.

Ослын газрыг орхиж явсан долоон осол бүртгэгдсэнээс гурвыг нь цагдаагийн алба хаагчид шуурхай олж, шалгаж эхэлжээ. Тухайлбал,

• Төв аймгийн Сэргэлэн сумын нутаг асфальтан замд H.Accent маркийн автомашин онхолдож зорчигч 18 настай А-н амь нас хохирч, гурван хүн гэмтсэн хэргийг Төв аймгийн Цагдаагийн газарт,
• БЗД-ийн нутаг Нарны зам, Нарантуул захын урд замд марк, улсын дугаар тодорхойгүй автомашины жолооч нь явган зорчигч 32 настай Т-г мөргөж гэмтээгээд хэргийн газрыг орхиж явсан бөгөөд тээврийн хэрэгслийг олж, шалгаж байна.

Гарсан зам тээврийн осол, хэргийг хэлбэрээр нь авч үзвэл явган зорчигч мөргөж гэмтээсэн 11 осол, мөргөлдөх хэлбэрээр дөрвөн осол бүртгэгдсэн нь явган зорчигч нар гарц гарамгүй хэсгээр, согтууруулах ундааны зүйл хэрэглэсэн үедээ замын хөдөлгөөнд оролцож осолд өртөж байна. Явган зорчигч мөргөж гэмтээсэн 11 ослын тав нь согтууруулах ундааны зүйл хэрэглэсэн үедээ хөдөлгөөнд оролцжээ