СУРАГГҮЙ БОЛСОН ТАВАН НАСТАЙ ОХИН ХУЛГАЙЛАГДСАН БАЙЖЭЭ

Дархан-Уул аймгийн Дархан сумын гуравдугаар багийн нутаг "Ширээ нурууны нутаг" гэх газар /сумын төвөөс баруун хойд зүгт таван км-т/ тус сумын харьяат Э гэгч 5 настай охин энэ сарын 19-ний өдөр 16:00 цагийн үед гэрээсээ гараад сураггүй болоод байсан.

Охиныг "Хараа" голын усанд живсэн байж болзошгүй тухай дуудлагын дагуу орон нутгийн Онцгой байдлын Эрэн хайх, аврах ангийн зургаан алба хаагч, Цагдаагийн байгууллагын 82 алба хаагч, орон нутгийн 24 иргэн, нийт 112 хүн, 11 техник хэрэгсэлтэйгээр хайж эхэлсэн. Улмаар тус багийн "Ширээ нурууны нутаг", Орхон сумын "Бүрэн толгой", Сэлэнгэ аймгийн Хушаат сумын "Хараа" голын гүүр хүртэл 52 км-т эрэн хайх ажиллагааг зохион байгуулсан ч үр дүнд хүрээгүй байна.

Гэтэл алга болсон охиныг хулгайлсан байжээ. Одоогийн байдлаар цагдаагийн байгууллагын алба хаагчид таван настай охиныг хулгайлсан этгээдийг илрүүлэн, саатуулаад байгаа аж. Ямар зорилготойгоор хулгайлсан эсэхийг тодруулахаар ажиллаж байна.