ГРЕКТ ТҮЙМРИЙН УЛМААС АМИА АЛДСАН ХҮМҮҮСИЙН ТОО 96-Д ХҮРЧЭЭ

Өнгөрсөн долдугаар сарын 23-ны өдөр Грект гарсан түймрийн улмаас амиа алдсан хүмүүсийн тоо 96-д хүрсэн талаар тус улсын галын албанаас мэдээлснийг "РИА Новости" агентлаг уламжлав.Галын улмаас түлэгдсэн 187 хүнийг эмнэлэгт хүргэсэн бөгөөд 12 хүн нас барсан талаар өмнө нь мэдээлж байв. Саяхан 68 настай эрэгтэй хүнд зэргийн түлэгдлийн улмаас эмнэлэгт амиа алдсан байна.

Грекийн Эрүүл мэндийн яамнаас мэдээлснээр, эдүгээ эмнэлэгт түймрийн улмаас түлэгдсэн 29 хүн эмчлүүлж буйгаас зургаа нь эрчимт эмчилгээ хийлгэж буй ажээ. Түүнээс гадна түймэрт өртөн, хүүхдийн эмнэлэгт эмчлүүлж буй нэг хүүхдийн биеийн байдал сайн байгаа юм байна.Долдугаар сарын 23-нд Грекэд их хэмжээний түймэр гарсны дийлэнх нь Аттикийн нутгийг хамарчээ. 40 хэмийн халуунд түймэртэй тэмцэх боломжгүй, дээр нь хүчтэй салхилж байсны улмаас гал түймрийг тогтоож дийлээгүй аж. Аттикийн зүүн өмнөд нутагт түймрийн улмаас хэдэн арван хүн амиа алдаж, 190 гаруй хүн түлэгдэж бэртжээ