ЗГ-ЫН ТЭРГҮҮНИЙ ХАМААТАН, ЗТХЯ-НЫ ХЭЛТСИЙН ДАРГА ЯАМНЫХАА МЭРГЭЖИЛТЭН ЭМЭГТЭЙН БИЕД ГЭМТЭЛ УЧРУУЛСАН ХЭРЭГТ ХОЛБОГДЖЭЭ

Сүүлийн жилүүдэд төрийн өндөр албан тушаалтнууд эрүүгийн гэмт хэрэгт холбогдох асуудал гарах болсон. Тухайлбал, УИХ-ын гишүүн асан Д.Гантулга хүчингийн хэрэгт холбогдож, бүрэн эрхээсээ татгалзсан бол түүнийг шүүх хурал энэ долоо хоногийн баасан гаригт болох тов гараад байна.

Мөн өнгөрсөн долоо хоногт ЗТХЯ-ны удирдах албан тушаалтнууд нэгнийхээ амь насыг хохироосон хэрэг гарсан бол үйл явдлаас хоёр хоногийн дараа суудлын вагон үерийн улмаас осолдсон хэрэг мандав. Иймд Ерөнхий сайд У.Хүрэлсүх ЗТХЯ-ны зарим албан тушаалтнуудад ёс зүйн хариуцлага тооцож, ажлын алдаа дутагдал гаргасан үндэслэлээр үүрэгт ажлаас нь чөлөөлж байгаагаа мэдэгдсэн. "ЗТХЯ-ыг тойрсон дээрх бүх асуудал олон нийтэд ил болж, анхаарлын төвд орсон учраас л яамны албан тушаалтнуудад хариуцлага тооцлоо" гэх шүүмжлэл иргэдийн дунд өрнөсөөр байна.

Учир нь дээрх хэргүүд болохоос өмнө ЗТХЯ-нд хэлтсийн дарга ажилтай залуу, тус яамны мэргэжилтэн эмэгтэйн биед гэмтэл учруулсан хэрэг гарсан нь нууцлагдмал байсаар өдий хүрсэн гэдгийг эх сурвалжууд мэдээлж байна. Тодруулбал, тус яаманд хэлтсийн дарга ажилтай Г гэгч тус яамны мэргэжилтэн Ъ /бид хохирогчийн нэрийг нууцалж өөр үсгээр орлуулав)-ийн биед хүндэвтэр гэмтэл учруулсан хэргээр Сүхбаатар дүүргийн цагдаагийн нэгдүгээр хэлтэст шалгуулсан байна. Эл хэрэг нь өдгөө шүүхийн шатанд шилжээд буй бөгөөд шүүх хурлын урьдчилсан хэлэлцүүлэг энэ долоо хоногт болно гэж таамаглаж байсан ч ирэх долоо хоногт болж магадгүй байгаа ажээ.

Түүнд Эрүүгийн хуулийн 11.4.1-т зааснаар "Хүний эрүүл мэндэд хүндэвтэр хохирол санаатай учруулах" гэсэн зүйл ангиар эрүүгийн хэрэг үүсгэжээ.

11.4 дүгээр зүйл. Хүний эрүүл мэндэд хүндэвтэр хохирол санаатай учруулах

1. Хүний эрүүл мэндэд хүндэвтэр хохирол санаатай учруулсан бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ" гэж заажээ.

Анхаарал татаж буй нэг зүйл нь сэжигтэн ЗТХЯ-ны хэлтсийн дарга Г нь Монгол Улсын Засгийн Газрын тэргүүний ойрын хамаатны хүүхэд гэх мэдээллийг зарим эх сурвалжууд өгч байна. Шүүх хурал хэзээ товлогдож, тус асуудал хэрхэн шийдэгдсэн талаар бид эргэн мэдээлэх болно

medee.mn