ҮЕРТ АВТСАН 20 ГАРУЙ АЙЛЫГ НҮҮЛГЭН ШИЛЖҮҮЛЛЭЭ

Дорноговь аймгийн Айраг суманд наймдугаар сарын 12-ны өдрийн 02:00-19:15 цагийн хооронд орсон борооны улмаас хонхор газарт их хэмжээний ус тогтож, найман айлын гэр усанд автжээ. Энэ үеэр хоёр хүн урссан тухай дуудлага аймгийн Онцгой байдлын газарт ирсэн байна.

Тус дагуу тус аймгийн Онцгой байдлын Эрэн хайх, аврах бүлгийн таван алба хаагч, нэг автомашин, нэг завьтайгаар 150 км зам туулан очиж, Хэнтий аймгийн Хэрлэн сумаас Дорноговь аймгийн Замын-Үүд сумын чиглэлд суудлын автомашинтай зорчиж явсан 37 настай эмэгтэй Э, 50 настай эмэгтэй Н нарын цогцсыг голын уснаас гаргаж, Цагдаагийн байгууллагад хүлээлгэн өгчээ. Түүнчлэн үерт автсан 20 гаруй айл өрх, нэг автомашиныг аюулгүй газарт нүүлгэн шилжүүлсэн аж.

Одоогийн байдлаар үерийн голомтод Айраг сум дахь Гал түймэр унтраах, аврах 23 дугаар анги, Говьсүмбэр аймгийн Онцгой байдлын газрын Гал түймэр унтраах, аврах 37 дугаар анги, Айраг сум дахь Улсын нөөцийн салбар, орон нутгийн иргэд зэрэг нийт 36 хүн, дөрвөн техник хэрэгсэлтэйгээр ажиллаж байна