НОГООН ЗҮЛЭГ СҮЙТГЭСЭН ЖОЛООЧИЙН ЖОЛООДОХ ЭРХИЙГ ХАСЧ, 50 МЯНГАН ТӨГРӨГӨӨР ТОРГОЖЭЭ

Энэ сарын 27-нд Замын цагдаагийн албанд "Саарал өнгийн "Субару" маркийн автомашин явган хүний зам зүлэг, ногоон байгууламжийг эвдэж сүйтгээд байна" гэсэн гомдол мэдээлэл иржээ. Тус мэдээллийн дагуу шалгахад 60-70 улсын дугаартай жолооч Б нь ногоон байгууламж сүйдлээд зогсохгүй хуурамч улсын дугаар зүүж, хөдөлгөөнд оролцсон байсан нь илэрсэн байна.

Долдугаар сарын 27-ны өдөр тэрээр 06-98 УНР буюу наймаар төгссөн хуурамч дугаартайгаар хөдөлгөөнд оролцжээ. Энэ тухайгаа тайлбарлахдаа жолооч Б "06-98 УНР машины дугаар байрны хажуу талын авто гаражид хэд хоног байхыг харсан. Тухайн өдөр хамт олноороо зугаалгад явах байсан ч миний машины дугаар хөдөлгөөнд оролцохгүй учир 06-98 УНР дугаараар хөдөлгөөнд оролцсон. Улсын дугаарыг зүүж, ганцхан өдөр л хөдөлгөөнд оролцсон" гэжээ.Зөрчлийн тухай хуульд зааснаар гурван сар тээврийн хэрэгсэл жолоодох эрхийг нь хасч, 50.000 төгрөгөөр торгосон байна