ЖИЛД 8000 ГАРУЙ УТАС ХУЛГАЙД АЛДАГДДАГ БАЙНА

Монгол Улсад үйлдэгдэж буй нийт гэмт хэргийн 39.2 хувийг хулгайн гэмт хэрэг эзэлдэг байна. Үүнээс халаасны хулгайн гэмт хэрэг нэлээд хувийг эзэлдэг гэх судалгаа гарчээ. Тодруулбал, 2017 онд нийт 4722 гар утас хулгайн замаар алдагдсан байна. Алдагдсан гар утасны 46 хувь буюу 1939 нь iPhone загварын гар утас, 42 хувь буюу 1772 нь Samsung загварын гар утас, 12 хувь буюу 506 нь бусад загварын гар утас байгаа аж.

Халаасны хулгайн гэмт хэргийн улмаас жилд дунджаар 7500-8000 орчим гар утас алдагдаж, улмаар ченжүүдийн гараар дамжин цааш зарагддаг байна. Албаны эх сурвалжийн мэдээлж буйгаар хууль бус зах зээл болох хулгайн гэмт хэргийг ченжүүд улам өөгшүүлдэг гэдгийг онцолжээ. Мөн ченжүүд нь сүүлийн үеийн андройд үйлдлийн системтэй гар утсыг сонгон захиалж энэ нь хулгайн гэмт хэрэг үйлдэгчдийг санхүүжүүлэх нөхцлийг бүрдүүлж дээрх төрлийн хэргийг дэлгэрүүлдэг байна.

Энэ төрлийн гэмт хэргийн хохирогчдыг хүйсийн хувьд авч үзвэл 18-25 насны хүмүүс эмэгтэйчүүд 40 хувь, 10-17 насныхан 35 хувь, 28-35 насныхан 15 хувь, 36 наснаас дээш хүмүүс 10 хувийг тус тус эзэлдэг аж.

Түүнчлэн гар утасны худалдаа эрхлэгчид нь гэмт хэргийн замаар хууль бусаар олдсон, эх үүсвэр нь тодорхой бус гар утас, эд зүйлсийг мэдсээр байж худалдан борлуулдаг. Ийм тохиолдолд тухайн этгээдийг Эрүүгийн хуулийн 18.6 дугаар зүйлийн 1-д зааснаар Мөнгө угаах гэмт хэрэгт холбогдон шалгадаг байна. Хулгайчийг 7-30 хоног албадан саатуулах арга хэмжээг авдаг аж