МОНГОЛ, ТУРКИЙН ХАМТАРСАН СУРГУУЛИЙН ЗАХИРЛЫГ ХУЛГАЙЛЖЭЭ

Монгол Улсад 24 жил үйл ажиллагаа явуулж байгаа Турк, Монголын хамтарсан сургуулийн захирал Veysel Akcay гэгчийг өнөөдөр /2018.07.27/ 09.30 цагийн орчимд гэрийнх нь үүднээс "Starex" маркийн автомашинтай үл таних этгээдүүд хулгайлан авч явжээ. Хэргийг Сүхбаатар дүүргийн цагдаагийн хэлтэс шалгаж байна. Тус сургуулийн Монгол талын ерөнхий захирал Б.Ганбат энэ талаар "Өнөөдөр 14.00 цагийн орчимд Турк Улсаас жижиг хэлбэрийн онгоц "Чингис хаан" олон улсын нисэх онгоцны буудалд бууна. Уг онгоц 3-4 цагийн дараа буцаад Турк руу нисэх мэдээлэл байна. Тиймээс хүн хулгайлах гэмт хэргийг хэн гэдэг хүн ямар зорилгоор хийсэн нь ойлгомжтой байгаа" гэв.Энэ талаар бид Цагдаагийн Ерөнхий газрын хэвлэлийн төлөөлөгчтэй холбогдон тодруулахад "Энэхүү мэдүүлгийн дагуу хулгайлагдсан эсэхийг шалгаж нөхцөл байдал тодорхой болсны дараа мэдээлэл өгөх боломжтой" гэлээ