Б.ЧИНГИС: ГЭРЭЛТ ГУДАМЖНЫ ЗАМЫГ БУДАХАД НИЙСЛЭЛЭЭС ГАНЦ Ч ТӨГРӨГ ГАРГААГҮЙ

Энэ долоо хоногт 'Гэрэлт гудамж'-ны замыг шатрын хөлөг шиг загварчилж будсан ч будаг нь бороонд урсан алга болжээ.Харин дөнгөж сая ажлыг гардан гүйцэтгэсэн албаныхан мэдээлэл хийлээ.

Гэрэлт гудамжны замыг будсан будгийг нийлүүлсэн "Жоби" худалдааны төвийн Ерөнхий менежер Б.Чингис уг хуралд оролцон мэдээлэл өгч байна. Тэрбээр "Бидний зүгээс нийгмийн хариуцлагаа ухамсарлан улсаас, нийслэлээс ямар ч зардал гаргахгүйгээр Гэрэлт гудамжны менежментийн баг, ЗЦА гээд холбогдох албаныхнаас зөвшөөрөл авч замыг будах ажлаа эхлүүлсэн. Ням гарагт зам хааж, будгийн ажил эхлээд Лхагва гарагийн орой зам нээсэн. Давхарлаж будах ёстой байсан хэдий ч амжаагүй. Ингээд гүйцэд хатаагүй, бүрэн бэхжилт өгөөгүй байсан будаг маань борооны улмаас ариллаа.

Бидний зүгээс иргэдийн тав тухыг алдагдуулсандаа албан ёсоор хүлцэл өчиж байна" хэмээн тайлбар хийлээ.

Эргэн сануулахад Нийслэлийн Засаг дарга бөгөөд Улаанбаатар хотын Захирагчийн 2017-2020 онд хэрэгжүүлэх үйл ажиллагааны хөтөлбөрт Улаанбаатар хотыг Зүүн хойд Азийн аялал жуулчлал, бизнесийн төв болгох зорилгыг тусгасан. Энэ зорилтын хүрээнд Сөүлийн гудамжийг автомашингүй, "Шөнийн гудамж" болгон тохижуулсан билээ.

Тус гудамж 2018 оны тавдугаар сарын 11-ний 20.00 цагт нээлтээ хийж, 2018 оны аравдугаар сарын 01-ний өдрийг хүртэл үйл ажиллагаа явуулах аж. Энэ хугацаанд долоо хоног бүрийн баасан гарагийн 20.00 цагаас даваа гарагийн 04.00 цагийн хооронд тус авто замын зорчих хэсгийн хөдөлгөөнийг бүрэн хааж байгаа юм.