ОРОН НУТГИЙН ТАКСИНЫ ЖОЛООЧ ЗОРЧИГЧОО ХҮЧИРХИЙЛЖЭЭ

Сүүлийн үед хүчирхийлэл, хүчингийн хэргийн гаралт нэмэгдэж, охин хүүхэдтэй хүн бүрийн санаа зовоох асуудал болсоор удаж байна. Гэмт этгээдүүд энэ төрлийн гэмт хэргийг үйлдэхдээ эмэгтэй хүний сул дорой байдлыг л далимдуулж хүч хэрэглэдэг. Ялангуяа архи согтууруулах ундааны зүйл хэрэглэж, өөрийгөө хянаж, биеэ авч явах чадваргүй болсон охид, бүсгүйчүүдийг хүчирхийлэх тохиолдлууд гарсаар байгаа талаар албаныхан мэдээлж буй юм.

Ойрын жишээ дурдахад, өнгөрсөн дөрөвдүгээр сард Сүхбаатар дүүргийн 18 дугаар хорооны нутаг дэвсгэрт "Гэрт хүргэж ирсэн таксины жолооч хүчиндлээ" гэсэн дуудлагын дагуу цагдаагийн байгууллага шалгалтын ажиллагаа хийжээ. Тодруулбал, хэргийн газарт Сүхбаатар дүүргийн Цагдаагийн хоёрдугаар хэлтсээс очиж, шуурхай шалгахад 24 настай Б-г таксины жолооч Б нь согтуу биеэ хамгаалах чадваргүй байдлыг нь далимдуулан хүчиндсэн байсныг цагдаагийн байгууллага үргэлжлүүлэн шалгаж байна.

Мөн энэ сарын 25-нд "Драгон" хүнс барааны захын урд зогсоолд Улаанбаатар-Өвөрхангай чиглэлд үйлчилгээнд явдаг автомашины жолооч хүчирхийллийн хэрэг үйлдсэн талаар баттай эх сурвалж мэдээллээ. Түүний хэлж буйгаар, Өвөрхангай аймгийн харъяат, 31 настай эмэгтэйг согтуурч, биеэ хамгаалж, эсэргүүцэл үзүүлэх чадваргүй болсон үед нь тухайн тэрэгний жолооч, 29 настай эрэгтэй далимдуулан автомашин дотроо хүчирхийлсэн хэрэг гарчээ. Тухайн үед согтуу байсан эмэгтэй Өвөрхангай аймаг руу явахаар тус машинд суусан бололтой.

Тиймээс шөнө оройн цагаар эмэгтэйчүүд ганцаараа таксинд суухдаа болгоомжтой байж, архи согтууруулах ундаа хэрэглэхгүй байх, хэрэглэсэн үедээ анхаарал болгоомжтой байхыг албаныхан анхааруулж байна.