МОДОНД ТӨӨРСӨН ИРГЭНИЙГ ОЛЖЭЭ

Энэ сарын 26-ны өдрийн 01:24 цагт Нийслэлийн Сонгинохайрхан дүүргийн 21 дүгээр хороо, Ар гүнтийн зусланд Нийслэлийн Сонгинохайрхан дүүргийн иргэн Б /43 настай, эрэгтэй/ мод руу ороод алга болсон тухай дуудлага иржээ. Нийслэлийн Онцгой байдлын газрын Аврах ангийн 5 алба хаагч, 1 техник хэрэгсэлтэйгээр 21 км зам туулан 02:27 цагт очиж, 2 цаг 30 минут ажиллаж, төөрсөн иргэнийг олж, эхнэр Д-д нь хүлээлгэн өгсөн байна.

Мөн Булган аймгийн Хутаг-Өндөр сумын Тээл багийн "Хагийн-Ам" гэдэг газар /аймгийн төвөөс баруун хойд зүгт 175 км-т, сумын төвөөс баруун хойд зүгт 25 км-т/ тус сумын харьяат иргэн Б /50 настай, эрэгтэй/ долдугаар сарын 18-ны өдрийн 09:00 цагт малдаа яваад сураггүй болсон тухай дуудлагыг долдугаар сарын 20-ны өдрийн 08:50 цагт хүлээн авчээ.

Тус сумын нутгийн захиргааны байгууллагын 25 хүн, 4 автомашин, 7 мотоцикл, 4 морьтой, ар гэрийн 35 хүн, 6 автомашин, 5 мотоцикль, нийт 60 хүн, 10 автомашин, 12 мотоцикл, 4 морьтойгоор ажиллаж, долдугаар сарын 25-ны өдрийн байдлаар Тээл багийн Намнан уулыг тойрч, 15 км-т эрэн хайх ажиллагааг зохион байгуулсан боловч үр дүнд хүрээгүй тул ар гэрийнхэнтэй нь зөвшилцөж, 10:35 цагт түр зогсоосон байна.

Баянхонгор аймгийн Жаргалант сумын Өлзий-Өндөр багийн "Таван жаргалантын урд салаа" гэдэг газар /сумын төвөөс баруун хойд зүгт 35 км-т/ долдугаар сарын 25-ны өдрийн 18:00 цагийн үед 14 м/с хүчтэй салхи салхилсны улмаас иргэн Н, Г нарын хоёр гэр нурсан тухай мэдээллийг 07.25-ны өдрийн 20:35 цагт хүлээн авчээ.

Нутгийн захиргааны байгууллагын 3 хүн, 1 техник хэрэгсэлтэйгээр 35 км зам туулан 22:46 цагт очиж, иргэн С /42 настай, эмэгтэй/-ийн биеийн байдал муу байсан тул анхны тусламж үзүүлж, сумын эмнэлэгт хүргэсэн байна.