ЦЭЦЭРЛЭГИЙН БҮРТГЭЛ ИРЭХ ДОЛОО ХОНОГООС ЭХЭЛНЭ

Нийслэлийн боловсролын газраас мэдээлснээр нийслэлийн хэмжээнд энэ жил төрийн өмчийн 223 цэцэрлэгт шинээр элсэн орж буй хүүхдийн цахим бүртгэл энэ сарын 25-наас эхлэн нэг сар гаруйн хугацаанд үргэлжлэхээр болжээ. Эцэг, эхчүүд www.tsetserleg.ulaanbaatar.mn вэб хаягаар орж, хүүхдээ бүртгүүлэх аж. Цахим бүртгэлд 2016 онд төрсөн буюу шинээр цэцэрлэгт орох хүүхдүүдийг хамруулах боломжтой.

Харин анги дэвшин орох хүүхдүүдийг цахимаар бус цэцэрлэг дээр нь ирэх наймдугаар сарын 21-нээс 23 хүртэл бүртгэхээр болсон аж.

Эцэг, эхчүүд хүүхдээ шинээр цэцэрлэгт бүртгүүлэх гэж буй бол цахим системд бүртгүүлэх хүүхдийнхээ регистрийн дугаарыг хийхэд аль дүүргийн хэддүгээр цэцэрлэгт хамрагдах тухай мэдээлэл гарч ирэх аж. Ингэснээр эцэг, эхчүүдийн гар утсанд бүртгэлийн тусгай дугаар ирэх юм байна. Цахимаар бүртгэснээр цэцэрлэгийн хүүхэд элсүүлэх орон тоо болон бүртгүүлсэн хүүхдийн тоо ил тод, нээлттэй харагдах боломжтой.

Өнгөрсөн онд 2-5 насны 146 мянга гаруй хүүхэд цахимаар бүртгүүлж байжээ. Түүний 113 мянга 597 нь цэцэрлэгт анх удаа элссэн хоёр настай хүүхдүүд байсан аж. Энэ жилийн хувьд ирэх намар цэцэрлэгүүдийн хүүхэд бүртгэсэн тоог харгалзан нэмэлт бүртгэл хийхээр төлөвлөсөн байна.