Ө.БАТ-ОРШИХ ЭНЭ ЖИЛИЙН НААДАМД ЗОДОГЛОХГҮЙ

МҮБХ-оос Улсын гарьд Ө.Бат-Орших, Улсын начин Э.Даш нарын барилдах эрхийг хоёр жилээр хассан шийд гаргасан. Мөн үндэсний баяр наадам зохион байгуулах комиссоос допингийн асуудалд холбогдсон бөхчүүдийг наадмаар барилдуулахгүй хэмээн мэдэгдээд буй юм. Ө.Бат-Орших, Э.Даш нар допингийн асуудлаар биш харин барилдах эрхийг нь үндэслэлгүйгээр хоёр жилээр хассан учраас эрхээ сэргээлгэхээр Баянзүрх дүүргийн Иргэний хэргийн шүүхэд хандаж, нэхэмжлэл гаргасан. Улмаар ялалт байгуулсан байдаг.

Гэвч өнөөдөр Улсын гарьд Ө.Бат-Орших энэ жилийн наадамд зодоглохгүй гэдгээ албан ёсоор мэдэгджээ. Энэ тухайгаа тэрээр "Монголын нийт ард түмэн, тэр дундаа монгол бөхийн үнэнч үзэгч, бөхийн хорхойтнууддаа миний бие энэ жил буюу Ардын хувьсгалын 97 жилийн ой, Үндэсний их баяр наадмаар барилдахгүй болсноо мэдэгдэж байна. МҮБХ нь надаас ямар нэг тайлбар авахгүйгээр "миний барилдах эрх" хассан тухайгаа олон нийтийн мэдээллийн хэрэгслээр зарласан. Баянзүрх дүүргийн ИХАШШүүх барилдах эрх хассан нь хууль бус гэдгийг тогтоосон шүүхийн ТОГТООЛ, шүүхийн шийдвэр биелүүлэх шүүгчийн ЗАХИРАМЖ, шүүхийн шийдвэр гүйцэтгэх хуудас гаргаад байгаа билээ. Хэдийгээр шүүхээр миний барилдах эрх сэргэсэн ч монгол төрийн наадам элдэв үймээнгүй, хэрүүл будлиангүй сайхан болж, монгол түмэн минь эвдрэл, хагарал, талцалгүй сайхан наадаасай гэж хүсч энэ жил үзэгчийн суудлаас наадам үзэхээр шийдлээ. Намайг дэмжиж, харж, хүлээж суусан дэмжигч олон түмнээсээ хүлцэл өчье. Монгол түмэн минь магнай тэнэгэр сайхан наадаарай. Бид эвтэй байхдаа дийлдэшгүй байсныг түүх гэрчилнэ" хэмээн бичсэн аж.