800 ОНОО АВСАН СУРАГЧДАА 1.5 САЯ ТӨГРӨГӨӨР УРАМШУУЛЛАА

Улсын хэмжээнд Элсэлтийн ерөнхий шалгалт (ЭЕШ)-д амжилттай оролцож 800 оноо авсан сурагчид олон бий. Улаанбаатар хотын хэмжээнд математикийн шалгалтанд 800 оноо авсан 22 сурагч байсан бол англи хэлний хичээлээр 80 сурагч хамгийн өндөр үнэлгээг авчээ.

ЭЕШ-д орон нутгийн сурагчид өндөр үнэлгээг авдаг бөгөөд зарим аймаг улсын хэмжээнд үзүүлэлтээрээ тэргүүлдэг байна. Одоогоор 800 оноо авсан Өмнөговь, Дорнод, Сүхбаатар аймгийн сурагчдыг мөнгөн шагнал болон тэтгэлгээр урамшуулжээ.

Өмнөговь аймгийн удирдлагууд 760 онооноос дээш 800 хүртэл авсан сурагчдыг 1-1.5 сая төгрөгөөр шагнаж урамшуулсан байна. Аймгийн Засаг даргын энэхүү тэтгэлэгт 11 сурагч хамрагджээ.

Мөн Дорнод аймгаас 800 оноо авсан сурагчид болон тэднийг бэлтгэсэн багш нарт аймгийн Засаг даргын нэрэмжит шагналыг гардуулан өгчээ. Сурагчдыг 1.0 сая төгрөг, багш нарыг 500 мянган төгрөгөөр урамшуулсан байна.

Сүхбаатар аймгаас хоёр сурагч 800 оноо авчээ. Математик, физик, нийгмийн ухааны хичээлээр өндөр оноо авсан дөрвөн сурагч инженер технологийн дээд боловсрол төсөлд хамрагдан Япон улсад суралцах эрхийн бичгийг гарджээ. Энэхүү хөтөлбөрөөр Сүхбаатар аймгаас 10 гаруй хүүхэд Япон улсад суралцаж байгаа юм байна.