​БАЯН-ӨНДӨР СУМЫН ЯРГУЙТ БАГТ 150 ХҮҮХДИЙН ЦЭЦЭРЛЭГИЙН БАРИЛГЫН ШАВ ТАВИХ ЁСЛОЛ БОЛОВ

Өнөөдөр Орхон аймгийн Баян-Өндөр сумын Яргуйт багт 150 хүүхдийн цэцэрлэгийн барилгын шав тавих арга хэмжээ боллоо. Цэцэрлэгийн шав тавих ёслолд аймгийн ИТХ-ын дарга П.Пүрэвлхагва, Засаг дарга Д.Батлут, Засаг даргын орлогч А.Түвшинжаргал, Баян-Өндөр сумын Засаг дарга С.Ганцогт болон тус багаас сонгогдсон аймаг сумын төлөөлөгчид, Яргуйт багийн иргэд оролцлоо.

Тус цэцэрлэгийн төсвийг УИХ-ын гишүүн, Гадаад бодлого, Аюулгүй байдлын байнгын хорооны дарга О.Содбилэг улсын төсөвт тусгуулсан бөгөөд БСШУЯ-наас тендерийн эрх орон нутагт шилжигдэн ирсэн бөгөөд манай аймгийн "Ээлт өлгий" ХХК тендерт ялж улсын төсвийн хөрөнгө оруулалтын 1 тэрбум 700 орчим сая төгрөгөөр барьж 2019 оны 4 дүгээр улиралд ашиглалтад хүлээлгэн өгөх юм.

Барилгын ажлыг барьж, ашиглалтад хүлээлгэн өгөх "Ээлт өлгий" ХХК нь манай аймагт үйл ажиллагаа явуулдаг бөгөөд аймгийн Хөдөлмөр халамж үйлчилгээний газарт бүртгэлтэй идэвхтэй ажил хайж буй иргэдийг туслах ажилтнаар авч ажлын байраар хангах аж. Энэхүү цэцэрлэг ашиглалтад орсноор алслагдсан багуудад боловсролын чанар хүртээмжийг нэмэгдүүлэхэд дөхөмтэйгээс гадна шинэ ажлын байр нэмэгдэнэ.