​Б.БАЯРСАЙХАНЫГ ГУРВАН ШАТНЫ ШҮҮХЭЭС БУРУУГҮЙ ГЭЖ ҮЗЖЭЭ

Одоогоос жилийн өмнө Боловсрол, соёл, шинжлэх ухаан, спортын яамны Төрийн нарийн бичгийн даргаар ажиллаж байсан Б.Баярсайханыг төрийн албанд тэнцэхгүй, төрийн албан хаагчдыг мэргэжлийн удирдлагаар хангаж ажиллаж чадаагүй зэрэг үндэслэлээр үүрэгт ажлаас нь чөлөөлсөн билээ. Өөрөөр хэлбэл, түүнийг Засгийн газрын ээлжит хуралдаанаар тус яамны Төрийн нарийн бичгийн даргын албан тушаалаас нь чөлөөлсөн байдаг.

Тэрбээр өөрийгөө хууль зөрчсөн үйл ажиллагаа явуулаагүй учир нэр төрөө сэргээлгэхээр шүүхэд хандсан байдаг юм. Харин шүүх хурал нь өнгөрсөн оны наймдугаар сард Б.Баярсайханы гомдлыг хэлэлцэж, түүний талд шийдвэрээ гаргасан төдийгүй Захиргааны хэргийн давж заалдах шүүх ч анхан шатны шүүхийн шийдвэрийг хэвээр үлдээсэн. Захиргааны хэргийн анхан болон давж заалдах шатны шүүхийн шийдвэрийг Засгийн газар хүлээн зөвшөөрөхөөс татгалзаж, Дээд шүүхэд хандсан байдаг. Тэгвэл Дээд шүүх Б.Баярсайхан, Засгийн газар хоорондын хүсэлт гомдлыг хүлээн авч хэлэлцээд шийдвэрээ гаргажээ.

Шүүх бүрэлдэхүүн давж заалдах шатны шүүхийн магадлалыг хэвээр үлдээсэн байна. Өөрөөр хэлбэл, Улсын Дээд шүүх шийдвэрээ Б.Баярсайханы талд гаргаж, Захиргааны хэргийн анхан болон давж заалдах шатны шүүхийн шийдвэрийг хэвээр үлдээжээ. Түүнчлэн өнгөрсөн хугацаанд ажилгүй байсан цалин, хөлсийг нь гаргуулах, албан тушаалд нь эргүүлэн томилох шийдвэрийг гаргасан байгаа юм. Ийнхүү гурван шатны шүүхээр заргаа авсан Б.Баярсайхан яамны ТНБД-аар ажиллах эрхзүйн орчин нь бүрдлээ гэсэн үг юм.