А.СҮХБАТ: БӨХЧҮҮДИЙГ Б.БАТ-ЭРДЭНЭ ХАГАЛГАН БУТАРГАЖ БАЙНА

Гацуурт" ХХК-ийн захирал Л.Чинбат, Дархан аварга Х.Баянмөнх, Дархан аварга Г.Өсөхбаяр, УИХ-ын гишүүн А.Сүхбат, Улсын гарьд Д.Рагчаа, Улсын заан Ц.Мягмарсүрэн нар /2018.06.15/ уулзжээ. Тэд Монголын Үндэсний бөхийн холбооны удирдлагууд эв зүйгээ олох, Үндэсний их баяр наадмыг зохион байгуулах, "Их Эе" хурлыг зохион байгуулах асуудлаар ярилцсан аж.

Энэ талаар УИХ-ын гишүүн А.Сүхбат "Энэ удаад сайхан уулзалт болсон. Гурван дархан аварга болон Улсын гарьд, заан цолтны төлөөлөл уулзалтад оролцлоо. Энэхүү уулзалтаар бөхчүүд үл ойлголцох байдлаа эцэс болгохоор ярилцаж, эвлэлийн гэрээ байгуулж, гарын үсэг зурах түвшинд хүрсэн. Гэтэл Дархан аварга Г.Өсөхбаяр нарын бөхчүүд Б.Бат-Эрдэнэ аваргатай зөвшилцөөд өглөө 08.00 цагт уулзъя гэсэн. Тэгтэл Б.Бат-Эрдэнэ аварга зөвшөөрсөнгүй гэсэн хариу бичиг ирлээ. Тэгэхээр Б.Бат-Эрдэнэ аварга бөхчүүдийг хагалан, бутаргаж байна. Тэр хүнд эв зүйгээ олж, бөхчүүдийг талцуулахгүй байх, наадмаа сайхан зохион байгуулах сонирхол огт алга. Цаана нь нөгөө л Нямдорж, Данзан нар байгаа. Хэрэв бөхчүүд талцан, асуудал хүндрэвэл ялыг нь Б.Бат-Эрдэнэ үүрээрэй" гэв.