FACEBOOK АЛДАА ГАРГАСНААС 14 САЯ ХЭРЭГЛЭГЧИЙН ХУВИЙН ПОСТ ОЛОН НИЙТЭД ИЛЭЭР НИЙТЛЭГДЖЭЭ

Тус компани өнгөрөгч тавдугаар сарын 18-22-ны хооронд шинэ тохиргоо туршиж байх үеэр энэ явдал болсон байна. Фэйсбүүкд пост, зураг нийтлэхдээ өөрөөс нь өөр хүнд харагдахгүй байхаар, эсвэл найз нартаа үзүүлэхээр, мөн хэн дуртай нь харахаар олон нийтэд нээлттэй байдлаар тохируулж болдог. Тэгвэл ил бус байхаар тохируулж нийтэлсэн нийтлэл, зураг зэргийг олон нийтэд нээлттэй байдлаар нийтэлж алдаа гаргасан гэсэн үг юм. Алдаа гарсныг мэдсэнээс хойш хэвийн байдалд нь оруулахын тулд компанийн мэргэжилтнүүд таван өдөр зарцуулжээ.

Үүнтэй холбоотойгоор Фэйсбүүк компаниас алдаа гарах үеэр хувийн постууд нь нээлттэй байдлаар тавигдсан хэрэглэгчдэд өнөөдрөөс эхлэн мэдэгдэл /notification/ илгээж эхэлсэн байна. Танд Фэйсбүүкээс "Please review your posts" гэсэн мэдэгдэл ирвэл хувийн тохиргоотой постууд тань олон нийтэд ил /public/ нийтлэгдсэн гэсэн үг.

Болсон явдалтай холбоотойгоор тус компанийн төлөөлөгч "Бид саяхан алдаа гаргасны улмаас хэрэглэгчдийн постууд автоматаар олон нийтэд дэлгэгдсэн байсныг олж илрүүллээ. Тэр дор нь асуудлыг засч залруулж, өнөөдрөөс эхлэн үүнд өртсөн хэрэглэгч нэг бүрт хүрч, аюулгүй байдлыг нь ханган ажиллахыг эрмэлзэж байна. Гэхдээ энэ нь зөвхөн тодорхой үед буюу тавдугаар сарын 18-наас 22-нд нийтлэгдсэн постуудад хамааралтай. Өөрөөр хэлбэл өмнөх постуудад нөлөө үзүүлээгүй. Хэрэглэгчид постын тохиргоогоо хүссэнээрээ өөрчлөн, нийтлэх боломжтой хэвээр байгаа" гэсэн тайлбар өгчээ