Б.БАХЫТГҮЛ УТСАА САЛГААД СУРАГГҮЙ БОЛЖЭЭ

"УИХ-ын гишүүн Д.Мурат болон Б.Бахытгүл хоёр 60 саяар эвлэрлийн гэрээ байгуулж, оргон зайлсан хуулийнханд олдохгүй байна" гэсэн мэдээлэл өчигдрөөс эхлэн гарч эхэллээ.

Тухайлбал, Д.Мурат Б.Бахытгүл гэгч эмэгтэйд бэлгийн дарамт үзүүлэхийг санаархсан, өөрийнхөө нууц эрхтэнийхээ зургийг явуулсан, элдвээр доромжилсон гэх хэрэгт буруутгагдан шалгагдаж байгаа бөгөөд Б.Бахытгүл ч мөн "Би өөрөө хохирогч болсон" хэмээн хуулийн байгууллагад Д.Муратыг шалгуулах хүсэлтээ гаргасан байдаг юм.

Тэгвэл тэрбээр хохирогч биш, олон жил Д.Мураттай дотно харилцаатай эмэгтэй байсан гэдгийг зарим хүмүүс илчилсэн байдаг юм. Нэр хүндээ унагаж, хэвлэл мэдээллийн хэрэгслээр муу муухай зүйлээр "од" болоод байсан тэд эвлэрч, харин энэ мэдээллийг анх олон нийтэд дэлгэсэн сэтгүүлчийг буруутгаж, шүүхэд өгсөн байгаа юм.

Тэгвэл Б.Бахытгүл өмгөөлөгч Г.Батбаяраас өмгөөллийн үйлчилгээ авч байгаа ор сураггүй алга болжээ. Энэ мэдээллийн талаар өмгөөлөгч нь "Муратаас хохиролд мөнгө авсан зүйл байгаа. Мөнгөний тоог шууд хэлэх боломжгүй, үйлчлүүлэгчийн нууц. Харин миний үйлчлүүлэгчийг хуулийн байгууллагаас 10-аад хоногийн өмнө дуудсан. Тодорхой шалтгааны улмаас ирж чадахгүй байгаа нь үнэн. Би одоо ч утас руу нь залгаад холбогдохгүй байна. Холбоо тасарсан нь үнэн. Холбогдсоны дараа ямар шалтгаанаар утсаа салгаснаа хэлэх байх. Тиймээс өөрийнхөө үйлчлүүлэгчийг оргосон гэж ярих нь зохимжгүй. Оргоогүй байх, харин холбогдож чадахгүй байна" гэжээ.