ГЕРМАНЫ АМЬТНЫ ХҮРЭЭЛЭНГЭЭС ОРГОСОН АРСЛАН, БАРСЫГ БУЦААЖ ТОРОНД НЬ ОРУУЛЖЭЭ

Германы баруун хэсэгт орсон ширүүн борооны дараа үерт автсан амьтны хүрээлэнгээс хоёр бар, хоёр арслан, нэг ирвэс, нийтдээ таван аварга биет муурын төрлийн араатан Баасан гарагт торноосоо зугтжээ. Хэдэн цагийн дараа тэднийг барьж, торонд нь буцаан оруулж чадсан байна. Люксембургийн хилийн ойролцоох Люнебах хотын иргэдийг өчигдөр гэрээсээ гарахгүй, хаалга, цонхоо хаалттай байлгахыг анхааруулж байв. Тус хүрээлэнгээс оргосон бас нэг аварга биетэн болох баавгайг орон нутгийн эрх баригчид буудаж хөнөөжээ. Шөнөжин орсон ширүүн бороо голын сав дагуу байрладаг Эйфел нэртэй хувийн амьтны хүрээлэнг үерт автуулсан юм байна. Гэхдээ торноосоо суллагдсан амьтад тус хүрээлэнгийн 30 га газраас холдоогүй болохыг дроноор эрэн сурвалжилж тогтоожээ.Онцгой байдлын албаныхан, гал сөнөөгчид араатнуудыг авлах ажилд оролцсон байна. Уолпоттын гэр бүлийнхний эзэмшдэг Эйфел амьтны хүрээлэн нийт 400 орчим амьтантай. Тэдгээрийн дотор Сибирийн ховор бар багтдаг байна. Хоёр жилийн өмнө зүүн Германы Лэйпциг хотын амьтны хүрээлэнгээс хоёр арслан тороо эвдэн зугтаж байжээ