ӨСВӨР НАСНЫХАНД ҮНЭ ТӨЛБӨРГҮЙ СЭТГЭЛ ЗҮЙН ЗӨВЛӨГӨӨ ӨГӨХ ТӨВ НЭЭГДЖЭЭ

Өнөөдөр Орхон аймагт "Нийгмийн Эрүүл мэндийн төв"-д "Сэтгэл зүйн зөвлөгөө өгөх" төв нээлтээ хийжээ. Уг төв нь ганцаарчилсан болон бүлгийн хэлбэрээр сэтгэл зүйн зөвлөгөө өгөх, өсвөр насны хүүхдүүдэд үнэ төлбөргүй үйлчлэх юм байна. Аймгийн Засаг даргын Тамгын газрын дарга Д.Соёлчхүүгийн санаачилгаар 8-12 дугаар ангийн сурагчдад сэтгэл зүйн зөвлөгөө өгөх зорилгоор 2017-2018 оны хичээлийн жилд "Сэтгэлийн анир" төсөл хэрэгжүүлжээ. Энэ хүрээнд сэтгэл зүйч, гэр бүл судлаач, хүүхдийн сэтгэл зүйч, сэтгэц, наркологийн эмчийн бүрэлдэхүүнтэй баг 8-12-р ангийн 5000 орчим сурагчид сэтгэл зүйн үнэ төлбөргүй зөвлөгөө, мэдээлэл өгсөн аж.

Мөн сэтгэл зүйн боловсрол олгох сургалт, "Өсвөр насны сурагчдын стрессийн түвшин, сэтгэл гутрал, гэр бүлийн харилцааны сэтгэл ханамжийг илрүүлэх" судалгаа авсан байна. Судалгаанд дөрвөн мянга 797 сурагч хамрагджээ. Харин сэтгэл зүйчдийн баг сурагчидтай уулзахад, дийлэнх нь гэр бүлийн харилцаа, үе тэнгийнхэнтэйгээ харилцах, үе тэнгийхний дарамт, гадуурхал, ганцаардлын асуудлаар зөвлөгөө авсан байна. Түүнчлэн аав, ээжийнхээ таарамжгүй харилцаанаас болж сэтгэл гутралд орох цаашлаад амиа хорлох оролдлого хийж байсан хүүхдүүдийг ганцаарчилсан зөвлөгөөнд хамруулжээ. Өсвөр насныхны сэтгэл зүйд тулгамдаж буй асуудлын шалтгаан нь гэр бүлийн харилцаа, гэр бүл салалт, архидалт, хүчирхийлэлтэй холбоотой байсан аж.