​ХАР ТАМХИНЫ ХЭРЭГТ ХОЛБОГДУУЛАН НАЙМАН ХҮНИЙГ ШАЛГАЖ БАЙНА ГЭЛЭЭ

ЦЕГ-аас өнөөдөр цаг үеийн асуудлаар мэдээлэл хийлээ. Тодруулбал, Тээврийн прокурорын газрын хяналтын прокурор асан Х.Тамир, Тагнуулын ерөнхий газарт ажиллаж байсан Б.Амарбаясгалан, "Ice top" хамтлагийн дуучин Коби нар хар тамхи хэрэглэж байгаад баригдсан талаарх мэдээлэл гарсан.

Энэ талаар ЦЕГ-ын хэвлэл мэдээллийн албаны дарга, дэд хурандаа Б.Баатархүү "ЦЕГ-ын хар тамхитай хэлтэс он гарсаар олон ажлыг зохион байгуулж, таслан сэргийлэх ажлыг удаа дараа зохион байгуулж байгаа. Тавдугаар сарын байдлаар хар тамхитай тэмцэх хэлтэс 21 холбогдчтой найман хэргийг илрүүлэн шалгаж байна.
2018 оны тавдугаар сарын 04-05-нд шилжих шөнө хар тамхины хэргээр шүүхээс хорих ялаар шийтгүүлж байсан 48 настай Ч, 29 настай П-тэй хамтран хар тамхи хууль бусаар олж авч тээвэрлэж байхад саатуулан баривчилсан. 48 настай Ч нь 2018 оны хоёдугаар сард мөн хар тамхины хэргээр ял эдлээд гарч ирсэн бөгөөд дахин гэмт хэрэгт холбогдсон байна.Мөн 2018 оны тавдугаар сарын 22-ны өдөр хар тамхины төрлийн ургамалыг хууль бусаар гэртээ ургуулсан иргэн 23 настай Б, 28 настай П нарыг мөн гэрээс нь баривчилсан. 2018 оны тавдугаар сарын 25-ны өдөр Монгол Улсын иргэн О, 36 настай Т, А нарыг мөн хар тамхины хэргээр баривчилсан. Сэжигтэн Т,А нар мөн өмнө нь хар тамхины хэрэгт холбогдож байсан хүмүүс байгаа" гэлээ.