ПРОКУРОР БОЛОН ТЕГ-ЫН МӨРДӨГЧ БАЙСАН ХҮМҮҮС ХАР ТАМХИНЫ ХЭРЭГТ ДАХИН ХОЛБОГДЖЭЭ

Өнгөрсөн баасан гаригийн орой Тээврийн прокурорын газрын хяналтын прокурор асан Х.Тамир, Тагнуулын ерөнхий газарт ажиллаж байсан Б.Амарбаясгалан нарыг хар тамхи, мансууруулах бодис хэрэглэсэн байдалтай байхад нь саатуулжээ. Эх сурвалжийн мэдээлж буйгаар, энэ сарын 25-ны өдрийн 20:00 цагийн үед тэднийг автомашиндаа мансуурсан байдалтай байхад нь ЦЕГ-ын Хар тамхитай хэлтсээс саатуулах арга хэмжээ авсан байна.

Баттай эх сурвалжийн мэдээлж буйгаар, Х.Тамир, Б.Амарбаясгалан нарын биед хийсэн шинжилгээгээр мансууруулах төрлийн "мөс" хэмээх бодис хэрэглэсэн болох нь тогтоогджээ. Улмаар тэдний автомашин болон орон гэрт нэгжлэг хийж, биедээ авч явсан "мөс" /ICE/-ийг нь хураан авсан байна. Тэд хэдий хэмжээний "мөс" авч явсан тодорхойгүй байгаа юм.

Олон нийтийн мэддэгчлэн Х.Тамир нь УИХ-ын гишүүн асан Д.Хувьтөгөлдөрийн хүү бөгөөд түүний төрсөн дүү Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн шүүгч Х.Идэр юм. Х.Тамирын хувьд Б.Амарбаясгалантай их сургуульд хамт суралцаж байсан найз нөхдийн харилцаатай нэгэн аж. Одоогийн байдлаар Х.Тамир, Б.Амарбаясгалан нарыг батлан даалтад гаргаж, гадуур шалгаж буй юм байна.