ТӨРИЙН АУДИТЫН БАЙГУУЛЛАГЫН 2017 ОНЫ ҮЙЛ АЖИЛЛАГААНЫ ТАЙЛАН

Төрийн аудитын байгууллага нь 2017 онд Төрийн аудитын тухай хууль болон бусад хууль тогтоомжийг удирдлага болгон дэвшүүлсэн зорилт, жилийн үйл ажиллагааны болон аудитын төлөвлөгөөнд тусгагдсан ажлуудыг бүрэн хэрэгжүүлэн үйл ажиллагаагаа явууллаа.

НЭГ. ЕРӨНХИЙ ЗҮЙЛ

Төрийн аудитын байгууллага 2017 оныг Төрийн аудитын тогтолцооны хууль эрх зүй, бодлогын шинэтгэл, ажилтнуудын сахилга, хариуцлагыг дээшлүүлэх жил болгон өөрчлөлт, шинэчлэлтийн хүрээнд үндсэн 7 том зорилтыг дэвшүүлэн хэрэгжүүлж ажиллалаа.

Төрийн аудитын байгууллага Улсын Их Хурлын Төсвийн байнгын хорооны 01 дүгээр тогтоолоор баталсан орон тооны дээд хязгаар болох 389 ажиллагсадтайгаар улсын хэмжээнд үйл ажиллагаа явуулж байгаагаас 312 буюу 80.2 хувь нь аудитын үйл ажиллагааг гүйцэтгэж, 77 буюу 19.8 хувь нь удирдлага болон дэмжих үйлчилгээ үзүүлэх хэсгийг бүрдүүлэн ажиллаж байна.

Төрийн аудитын байгууллагын 2017 оны үндсэн үйл ажиллагаа, түүний үр дүнг товч тоон үзүүлэлтээр харуулбал:

Төрийн аудитын байгууллага нь санхүүгийн тайлангийн 3179, гүйцэтгэлийн 210, нийцлийн 167, нийтдээ 3556 аудит хийжээ.

Аудитаар 11,477.9 тэрбум төгрөгийн зөрчил илрүүлж, түүний 19.5 хувийг аудитын явцад залруулж бусад зөрчлийг залруулахаар акт, албан шаардлага, зөвлөмж өгөгдсөн байна.

Төрийн аудитын байгууллагын ажилтнууд 22.4 тэрбум төгрөгийн акт тогтоож, тухайн онд 11.0 тэрбум төгрөгийн актыг барагдуулжээ.