БАССЕЙН, САУНУУДЫН УС НЯНГИЙН БОХИРДОЛТОЙ ГАРЧЭЭ

Нийслэлийн мэргэжлийн хяналтын газраас өнгөрсөн гуравдугаар сарын 12-наас дөрөвдүгээр сарын 20 хүртэл, саун бассейны газруудад шалгалт хийжээ.

Шалгалтад Нийслэлийн нутаг дэвсгэрт үйл ажиллагаа явуулж буй 14 саун, 7 халуун ус, 10 усан бассейн хамрагдсан байна.

Сауны газруудаас 14.2% нь бага, 85.7% нь дунд эрсдэлтэй, усан бассейн, чийрэгжүүлэлтийн усан сангаас 50% нь бага эрсдэлтэй, 50% нь дунд эрсдэлтэй, "Халуун усны газруудаас 85.7% нь дунд, 14.2% нь их эрсдэлтэй гэж үнэлэгджээ.
Харин илэрсэн нийтлэг зөрчлийн тухайд гэвэл, дотоодын хяналт тавих журам тогтоож, мөрдөж ажиллаагүй. Усан бассейн, спорт сургалтын төвүүд дотоодын хяналтын лабораторигүй нь Сауны газруудын барилга байгууламжууд нь батлагдсан зураг төслөөр баригдаагүй, барилгын суурин давхрын хийц өөрчилж, үйл ажиллагаа явуулж байна.

Үйлчилгээний ажилчид эрүүл мэндийн урьдчилан сэргийлэх үзлэг шинжилгээнд хамрагдаагүй жилд нэг удаа хамрагдсан үзлэгийн дэвтэртэй боловч, эмчийн тамга тэмдэг, гарын үсэг зөрөөтэй хуурамч бичиг баримттай байгаа нь үйлчлүүлэгч нарын дунд арьсны болон амьсгалын замын халдварт өвчнийг тархаах нөхцлийг бүрдүүлж байна.

Угаалга цэвэрлэгээний байдалд лабораторийн шинжилгээ хийхэд БГД-ийн "Усан спорт сургалтын төв", Түмэн занги ХХК-ийн "Говь" саун-ы усан бассейн, Максложинг ХХК-ийн "Рамада саун"-ы чийрэгжүүлэх усан сан, МЧБС ХХК-ийн "Соёл саун"-ы чийрэгжүүлэх сангийн ус нянгийн бохирдолтой.

"Нарантуул шейл ойл" ХХК-ийн бассейн, "Халиун төгөл" ХХК-ийн бассейны ус нь үлдэгдэл хлор бага гарсан. Усан бассейн, чийрэгжүүлэх усан сангийн усанд гэдэсний бүлгийн савханцар илэрсэн нь тухай газрын ариун цэвэр, халдвар хамгааллын дэглэм хангалтгүй, үлдэгдэл хлор зөвшөөрөгдөх дээд хэмжээнээс бага гарч байгаа нь бассейны усыг байнгын эргэлтэд байлгах шахуурга, шүүлтүүр болон халдваргүйжүүлэлтийн тоног төхөөрөмжийн эргэлт, усан сангийн ус бүрэн солигдох хугацаа шаардлага хангахгүй байгаатай холбоотой.

Саун, халуун усны ажлын байрны эд хогшил, тоног төхөөрөмж, зөөлөн эдлэл / үйлчилгээнд хэрэглэгдэж буй шаахай, амралтын хувцас, гар нүүрийн алчуур/ зэргээс нийт 14 газраас 99 арчдас авсан. 12 газрын 79 арчдасны 15 буюу 18.9 %-д гэдэсний бүлгийн савханцар E.Coli илэрсэн нь дээрх газруудын цэвэрлэгээ, халдвар хамгааллын дэглэм шаардлага хангахгүй байгааг харуулж байна. Мөн дээрх газруудад эмнэлгийн анхан шатны тусламж үзүүлэх эмийн сангийн бүрдүүлэлт муу.
19 газрын үйлчилгээний ажиллагсад нь хувийн дугаар бүхий энгэрийн тэмдэггүй, үйлчилгээний онцлогт тохирсон зориулалтын ажлын хувцасгүй, Зөөлөн эдлэл угаах угаалгын өрөө нь эрүүл ахуйн урсгал буруу, цэвэр бохир хэрэглэл нэг дор байрласан, өрөөний хана, тааз мөөгөнцөрдсөн. Саунд орж болохгүй өвчнүүдийн заалтыг ил бичиж байрлуулаагүй байжээ.

Тиймээс Зөрчил гаргасан 10 аж ахуй нэгжид улсын байцаагчийн албан шаардлага, есөн аж ахуй нэгжид албан даалгавар, 12 аж ахуйн нэгж, хоёр иргэнд нийт 5.500.000 төгрөгийн шийтгэл ногдуулжээ.