ХАКУХО, КАКҮРЮҮ, ТОЧИНОШИН НАРЫН ХООРОНД ГОЛ ӨРСӨЛДӨӨН БОЛОХ НЬ

Арлын орны мэргэжлийн сүмогийн тавдугаар сарын Нацү башёг есдэх өдөр төгсөхөд Гүржийн бөх Точиношин 9 даваатай ганцаараа тэргүүлж байна.

Түүнийг ёкозуна Какүрюү М.Ананд, Хакүхо М.Даваажаргал нар 8 даваа, нэг унаатай нэхэж явна. Какүрюү өчигдөр Шодайг, Хакүхо экс озеки Котошёогикүг тус тус даван наймдахь даваагаа авсан. Какүрюү М.Ананд өнөөдөр Котошёогикүтэй, Хакүхо М.Даваажаргал Эндотой барилдахаар оноолт таарсан.

Япон озеки Гойёдо өчигдрөөс эхлэн башёг орхисон бөгөөд түүнтэй барилдах байсан сэкиваке Ичиножо сул даваа авсан. Сэкиваке Ичиножо өнөөдөр Шодайтай хүч үзнэ. Сэкиваке Точиношин өчигдөр Дайейшогоор 9 дэх даваагаа авсан ба өнөөдөр Чиёотайрюүтэй оноолт таарчээ.

Тамаваши Б.Мөнх-Оргил өнөөдөр Абитай барилдах бөгөөд гурван даваа, 6 унаатай башёг үргэлжлүүлж байна. Маэгашира цолтой Чиёошома Г.Мөнхсайхан 2 даваа, 7 унаа, Араваши Э.Дөлгөөн 3 даваа, 6 унаатай башёг үргэлжлүүлж байна.