МҮЭХ-НЫ УДИРДЛАГУУД СУУЛТАД НЭГДЛЭЭ

Цалин нэмүүлэхийн төлөөх ажил хаялтын өмнөх суулт өнөөдрөөс эхлэн улам хүрээгээ тэлж МҮЭ-ийн холбооны ерөнхийлөгч Х.Амгаланбаатар, дэд ерөнхийлөгч С.Эрдэнэбат, ерөнхий нарийн бичгийн дарга Г.Адъяа нар гишүүд дэмжигчдийнхээ хамт суултад нэгдэж байна. Суулт өнөөдөр буюу 2018 оны тавдугаар сарын 21-ний 9.00 цагаас Сүхбаатарын талбайд эхэлнэ.

МҮЭ-ийн шаардлагаар Хөдөлмөр, нийгмийн зөвшлийн гурван талт 2017-2018 оны улсын хэлэлцээрээр тохиролцсоны дагуу 2018 оны тавдугаар сарын 1-ний өдөр эхэлсэн цалингийн нэмэлт хэлэлцээ 2018 оны тавдугаар сарын 15-нд дахин үргэлжилсэн боловч тодорхой үр дүнд хүрээгүй тул нийт ҮЭ-ийн зүгээс холбогдох хуулийн дагуу хөдөлмөрийн хамтын маргааныг үүсгэн тэмцлийг орон даяар зохион байгуулахаа мэдэгдсэн билээ. Ийнхүү МҮЭ-ийн холбооны Ерөнхий зөвлөлийн Тэргүүлэгчид тавдугаар сарын 16-ны ээлжит хуралдаанаараа Төрийн албан хаагчдын цалин хөлсийг 50-иас доошгүй хувиар энэ оны хоёрдугаар улиралд багтаан нэмэгдүүлэх саналын хариуг 2018 оны тавдугаар сарын 21-ний дотор ирүүлэх, санал нэгдээгүй тохиолдолд тухайн өдрөөс Хөдөлмөрийн тухай хуулийн 115 дугаар зүйлийн 115.1 дэх хэсгийг үндэслэн Хөдөлмөрийн хамтын маргаан үүсгэх шийдвэр гаргасан юм.