ХУЛГАЙН ЭД ЗҮЙЛ ТЭЭВЭРЛЭН ЯВСАН НАЙМАН ЭТГЭЭДИЙГ ИЛРҮҮЛЖЭЭ

2018.05.14-17-ний өдрүүдэд нийслэл хотын хэмжээнд Замын цагдаагийн алба нийт 1135 дуудлага мэдээлэл бүртгэгдсэнээс зам тээврийн ослын 768 дуудлага бүртгэгдсэн бөгөөд ослын улмаас нийслэлд 51 хүн гэмтэж бэртсэн бөгөөд үүний 10 нь бага насны хүүхэд тэр дундаа явган зорчигч хэлбэрээр хөдөлгөөнд оролцож байхдаа осолд өртсөн байна. Осолд өртсөн хүүхдийн долоо нь ганцаараа явж байсан бол гурав нь эцэг, эхийн хамт явж байсан.

Алба хаагчдаас гудамж замд хяналт шалгалт хийж ажиллахдаа хулгайн эд зүйл тээвэрлэж явсан хэргийг мөн гэмт хэрэгт сэрдэгдсэн найман этгээдийг илрүүлэн харьяа Цагдаагийн хэлтэст хүлээлгэн өглөө.

Цагдаагийн байгууллагаас гудамж замд хийсэн хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 126 зөрчлийг илрүүлсэн бөгөөд тээврийн хэрэгсэл жолоодох эрхгүй, жолоодох эрх нь дуусгавар болсон үедээ согтуугаар тээврийн хэрэгсэл жолоодсон 27 жолоочид шүүхээр 7-30 хоног баривчлах шийтгэл оногдуулсан байна.

Нийт бүртгэгдсэн зам тээврийн осол, хэргийг үйлдэгдсэн хэлбэрээр нь авч үзвэл явган зорчигч мөргөж гэмтээсэн 29 осол, мөргөлдөх хэлбэрээр 30 осол тус тус бүртгэгдсэн бөгөөд нийт бүртгэгдсэн ослыг өмнөх долоо хоногтой харьцуулахад зам тээврийн ослын дуудлага 1,9 хувиар, согтуугаар тээврийн хэрэгсэл жолоодсон зөрчил 10 хувиар тус тус буурсан бол гэмтсэн хүний тоо 34,2 хувиар, хүүхэд өртсөн осол 25 хувиар өссөн үзүүлэлттэй байна