Б.БААТАРХҮҮ: ХУУЛЬ ТОГТООМЖИЙН ДАГУУ ТАЛБАЙ ДЭЭРХ ЦУГЛААНЫГ АЛБАДАН ТАРААСАН

Цагдаагийн ерөнхий газрын Хэвлэл мэдээллийн төвөөс өнөөдөр цаг үеийн асуудлаар мэдээлэл хийлээ.

Тодруулбал, өчигдөр орой Сүхбаатарын талбай дээр цуглаан хийж байсан иргэдийг цагдаагийнхан хүчээр албан тарааж буулгасан. Мөн Дархан-Уул аймагт галт тэрэг замаасаа унасан талаар мэдээлэл өглөө.

Мэдээллийн эхэнд ХМТ-ийн дарга, цагдаагийн дэд хурандаа Б.Баатархүү "Тавдугаар сарын 17-ны өдрийн 11.30 цагаас эхлэн Сүхбаатарын талбайд гэр хорооллын хөдөлгөөн ТББ-аас бүртгэлгүй майхантай цуглаан зохион байгуулсан. Энэ нь Монгол Улсын жагсаал цуглаан хийх журмын тухай хуулийн 11.8 –т заасан "Нийслэл Улаанбаатар хотын Сүхбаатарын талбайд жагсаал зохион байгуулахдаа гэр майхан, бусад түр орогнох байр барих болон хоноглохгүй байх, түүнчлэн бүх төрлийн тээврийн хэрэгслийг нэвтрүүлэхгүй байх" гэсэн заалтыг зөрчсөн байх тул хууль бус жагсаал цуглааныг нэн даруй зогсоохыг Гэр хорооллын хөдөлгөөн ТББ-ын тэргүүнд Сүхбаатар дүүргийн цагдаагийн нэгдүгээр хэлтсээс албан шаардлага өгсөн.

Мөн Сүхбаатар дүүргийн Засаг даргын Тамгын газраас бүртгэлгүй цуглаан хийж байгаа тул жагсаал цуглаан хийх тухай хуулийн 14.2-т заасныг үндэслэн хоёр цагийн дотор зохион байгуулж буй үйл ажиллагааг тараахыг шаардсан байгаа. Дүүргийн цагдаагийн хэлтсээс жагсаал цуглаан байгуулж буй Гэр хорооллын хөдөлгөөн ТББ-ын тэргүүн Б.Батсүхэд удаа дараа анхааруулга, шаардлага өгсөн ч хүлээж аваагүй. Иймд өчигдөр оройн 21.50 цагт цагдаагийн байгууллагаас хууль тогтоомжийн дагуу уг цуглааныг албадан тараах ажиллагааг зохион байгуулсан" гэв