МАНАЙ УЛСЫН ДААМЧИД АЗИ ТИВИЙН АШТ-ЭЭС 48 МЕДАЛЬТАЙ ИРЖЭЭ

БНХАУ-ын Шаньдун мужийн Шинтай хотноо дөрөвдүгээр сарын 21-26-ны өдрүүдэд даамын Ази тивийн аварга шалгаруулах тэмцээн болж өндөрлөлөө. Зуун буудалт даамын үндсэн, рапид, блиц төрлүүдээр зохиогдсон тус тэмцээнд Монгол, БНХАУ, Казахстан, Кыргызстан, Узбекистан, Туркменистан, Пакистан, Сингапур, Япон, Тайланд зэрэг 10 улсын тамирчид 36 багц медалийн төлөө өрсөлджээ.

Тус тэмцээнд манай улсаас нийт 67 тамирчин зургаан насны ангилалд өрсөлдсөн бөгөөд 13 алт, 19 мөнгө, 16 хүрэл, нийт 48 медаль хүртсэн амжилтыг үзүүлсэн байна. Мөн багийн дүнгээр зохион байгуулагч орны дараа хоёрдугаар байрт жагсчээ. Тэмцээний төрөл тус бүрээр ангилбал үндсэн төрөлд 17 медаль, рапид буюу түргэн тоглолтын төрөлд 16 медаль, блиц буюу түргэвчилсэн тоглолтод 15 медаль тус тус хүртсэн аж. Манай даамчдаас Б.Мөнхжин, Б.Мишээл, Г.Дүүрэнбилэг, С.Мөнх-Оргил, Г.Буяндэлгэр, Б.Энхрийлэн нар оролцсон төрөл болгоноосоо медаль зүүжээ.

Мөн эрэгтэйчүүдийн насанд хүрэгчдийн ангилалд Ц.Отгонбилэг хоёрдугаар байр эзэлж Олон улсын мастер цол хүртсэн бол, эмэгтэйчүүдийн нээлттэй ангиллын гуравдугаар байр, залуучуудын алтан медалийн хамт хүртсэн 12 настай Э.Хүслэн Дэлхийн даамын холбооны мастер цолын болзлыг биелүүллээ. Эдгээр тамирчид 2019 оны насанд хүрэгчдийн ДАШТ-д оролцох эрхийг авсан аж