А.ЭНХБААТАР: ЭНЭ ЖИЛЭЭС УНААЧ ХҮҮХДИЙН ОСЛЫН ДААТГАЛЫН ХЭМЖЭЭГ НЭМЭГДҮҮЛНЭ

Энэ жилээс эхлэн ГХЗХГ-аас хурдан морины уралдаанч хүүхдүүдийн гэнэтийн осолын даатгалын хувь хэмжээг нэмэгдүүлэх талаар холбогдох байгууллагуудтай хамтран ажиллаж байгаа юм байна.

Жил бүр унаач хүүхдийн эрхийн асуудал зун, өвлийн улиралд эрчимтэй яригддаг. Учир нь тавдугаар сарын 01 хүртэл хурдан морины уралдаан зохион байгуулахийг хориглочихоод байхад гуравдугаар сард Дүнжингарав уралдааныг зохион байгуулсаар хоёр дахь жилийнхээ нүүрийг үзээд буй. Гэвч энэ бүх зүйлийн ард унаач хүүхдүүд амь нас эрүүл мэндээрээ хохирон үлдэж буй жишээ нэгээр дуусахгүй. Дүнжингарав-2018 хурдан морины уралдааны үеэр 16 хүүхэд мориноосоо унаж бэртэж гэмтжээ. Харин эдгээр хүүхдүүд дундаас 11 настай хүү хүнд гэмтэж ГССҮТ-д тархины цус хуралт гэсэн оноштойгоор саяхныг хүртэл хэвтэн эмчлүүлсэн гэх мэдээллийг эх сурвалжууд мэдээллээ. Бид энэ талаар Монголын Морин Спорт Уяачдын Холбооны ерөнхий нарийн бичгийн дарга П.Сэргэлэнгээс утсаар тодруулахад "Дүнжингаравын үеэр унаж бэртсэн хүүхэд байхгүй. Бүгд эдгэрээд эмнэлэгээс гарчихсан. Би энэ ажлаа өгнө гээд хэлчихсэн байгаа" гэх мэдээллийг өгсөн юм. Дан ганц өвөл хаврын улиралд гэлтгүй зуны улиралд нутаг бүр том жижиг уралдаан зохион байгуулдаг. Өнгөрсөн жил улсын хэмжээнд нийт 394 хурдан морины уралдаан болжээ. Үүнийг дагаад хүүхэд мориноос унаж бэртэх эрсдэл тулгарч байгаа юм.