БӨХЧҮҮД ДАХИН "ИХ ЭЕ"-ЭЭ ХУРАЛДУУЛАХААР БОЛЖЭЭ

Сүүлийн үед МҮБХ-нд үүсээд байгаа асуудлаас болж бөхчүүд хоорондоо хагаралдаж, бөхөө үздэг дээдэлдэг ард түмэн нь нутаг нуга дов жалгаараа хагаралдаж талцсан асуудал хурцадсан. Бүр сүүлдээ Ерөнхийлөгчийн анхааралд орж, тогоон дотроо учраа олохгүй байгаа бөхчүүдийн цолыг нь хураана гэж хатуу сануулга өгөв. Даруйхан эв зүйгээ олохгүй бол Бөхийн өргөөг төр мэдэлдээ авна гэдгээ ч мэдэгдсэн юм.Тэгвэл үүсээд байгаа маргаанаа нэг мөр цэгцлэхээр өнгөрсөн амралтын өдрүүдэд бөхчүүд дахин хуралдаж, "Их Эе" хурлыг зохион байгуулах ажлын комисс байгуулах саналд нэгджээ. "Гацуурт" ХХК-ийн захирал Л.Чинбат тэргүүтэй Дархан аварга Х.Баянмөнх, Улсын арслан Д.Мөнх-Эрдэнэ, Улсын заан Б.Сайнбаяр, Ц.Магалжав, Улсын начин Ц.Дуламсүрэн нарын бүрэлдэхүүнтэй ажлын комисс байгуулахаар болжээ.Монголын үндэсний бөхийн холбоо Л.Чинбат, Б.Бат-Эрдэнэ гэсэн хоёр даргатай байсан бол тэд хоёулаа МҮБХ-ны даргаас нэрээ татаж, "Их Эе" хурлаа дахин хийхээр болсон байна.Тиймээс Дархан аварга Х.Баянмөнхөөр ахлуулсан ажлын хэсэг байгуулж, "Их Эе" хурлаа зохион байгуулах, товлох комиссоор ажиллах юм байна.Монгол Улсын Ерөнхийлөгчийн зүгээс тавдугаар сард багтаан бөхийн холбоо маргаанаа цэгцэл гэсэн үүрэг чиглэл өгсөн байгаа учраас тэд даруй "Их эе" хуралдуулахаар ярилцсан байна.