1940-ӨӨД ОНЫ ЗАГВАРЫН МАШИНУУД ДАХИН МОДАНД ОРНО

"Morgan Motor"компани 1909 онд байгуулагдсанаасаа хойш гурван дугуйтаас авахуулаад өнөө үеийн тренд болоод байгаа цахилгаан мотортой машин гээд бүгдийг нь Их Британий Вест Мидландсд үйлдвэрлэсээр иржээ. Тус компани нь машиныг хүн бүрийн хэрэгцээ болоход гол үүрэг гүйцэтгэсэн гэж мэргэжилтнүд үздэг байна. Ахлах дизайнер Жонатан Уэллс "Хэрвээ Морганыг мэдэхгүй хүнд компаниа танилцуулаач ээ гэвэл би Британий хөнгөн жингийн спорт машин гэж тайлбарлах болно. Гар аргаар үйлдвэрлэсэн, зөвхөн таньд зориулсан бас дахин давтагдашгүй" гэж хэлж байна. Дэлхийн хамгийн анхны автомашин үйлдвэрлэгчдийн нэг болох "Morgan Motor"компани олон жилийн уламжлал болоод үйлчлүүлэгчдээ хадгалж чадсан газар юм. 1900-аад оны машин үйлдвэрлэх гар ажиллагаагаа одоо ч орчин үеийн техникийн дэвшилтэй хослуулан хэрэглэсээр байгаа аж. Уэллс "Бид машинуудаа үйлдвэрлэхдээ орчин үеийн загвар, техник болоод орчин үеийн хөдөлгүүртэй хийдэг. Манай техник зах зээлд өрсөлдөх чадвартай. Ялангуяа бид бүхээгний хэсгээ өөрсдөө үйлдвэрлэдэг. Гэхдээ хэлбэрийг нь модон рамаар, гар аргаар хийж хөнгөн цагаанаар бүрдэг" гэж хэлсэн юм. Нэг машиныг бүтээхэд найман 7хоног хүртэл хугацаа шаардагддаг учраас жилд мянга хүрэхтэй үгүйтэй машиныг үйлдвэрлэн гаргадаг байна. Тус компани түүх дахин давтагддаг тун удахгүй, 1940-өөд оныг санагдуулам машинууд дахин гарч ирэх болно гэж үзэж байна.