ХЯТАДЫН ЦАГДАА НАР ХҮНИЙГ ЦАРАЙГААР НЬ ТАНЬДАГ НҮДНИЙ ШИЛИЙГ АШИГЛАЖ ЭХЭЛЛЭЭ

БНХАУ-ын цагдаа нар гэмт хэрэгтэй тэмцэхийн тулд өндөр технологийг ашиглаж эхэллээ. Энэ нь олон хүний дундаас хүнийг царайгаар нь таньдаг програм бүхий нүдний шил юм. Одоогоор Жэнжоугийн галт тэрэгний буудал дээр ажиллаж байгаа цагдаа нарын ашиглаж байгаа энэ ухаалаг нүдний шилийг "ЛЛ Вижн Текноложи" компани бүтээсэн байна. Олны дундаас хэрэгтнийг хурдан ялгаж танихын тулд тухайн хүний зургийг хадгалсан зөөврийн хардыг нүдний шилтэй холбодог байна. "Энэ шил100 милисекундын дотор арван мянган хүний царайг таних чадалтай" гэж үйлдвэрлэгч компаний технологийн салбарыг хариуцсан захирал Ву Фей "Волл Стрийт Журнал" сэтгүүлд өгсөн ярилцлагадаа хэлжээ. Тун удахгүй Хятадын цагаан сарын баяр болох гэж байгаатай холбоотойгоор цагдаа нар уг нүдний шилийг аялах хориотой боловч баяраар гэр бүлдээ очихоор явж байгаа иргэдийг танихад ашиглаж байна. Орон нутгийн хэвлэлийнхний мэдээлж байгаагаар тэд одоогоор хуурамч бичиг баримттай явж байсан 26 иргэнийг галт тэрэгний буудлаас илрүүлснээс гэмт хэрэгт холбоотой хэмээн сэжиглэгдэн цагдаагийн газарт эрэн сурвалжлагдаж байсан 7 хүнийг баривчилжээ. Олон улсын хүний эрхийг хамгаалах "Эмнести интернейшнал" байгууллага энэхүү шилэнд шүүмжлэлтэй хандаж байна. Тус ТББ энэ шил магадгүй хэрэгтнүүдийг илрүүлэхэд тус болж мэдэх ч, энэ төхөөрөмжийг засгийн газрыг эсэргүүцэгчдийн эсрэг ч ашиглах боломжтой гэж үзэж байна.