ГЕРМАН УЛС ХАМГИЙН ИХ БӨГЛӨРӨЛТЭЙ ХОТУУДЫН ЖАГСААЛТЫГ ГАРГАЛАА

ХБНГУ хамгийн их бөглөрөлтэй хотуудын жагсаалтыг гаргасан байна. 2016 онд нийслэл Берлин хот жагсаалтын 6-рт бичигдэж байсан бол 2017 онд 3-р байранд бичигдсэн байна. "Инрикс" хэмээх олон улсын сүлжээнд холбогдсон машин болон өөрөө явагч тээврийн хэрэгслүүдийг судалдаг байгууллагын явуулсан судалгаанаас харахад Герман улсын хэмжээнд хамгийн их бөглөрөлтэй хотуудаар Мюнхен, Хамбург, Берлин хотууд тодорчээ. Өнгөрсөн жил Мюнхен хотын жолооч нар 51 цаг бөглөрөлд зогссон бол Берлиний жолооч нар 44 цагийн турш бөглөрөлд зогсчээ. Гэтэл Берлинчүүд 2016онд 38цаг бөглөрөлд зогсдог гэсэн судалгаа гарч байсан юм. Судлаачид бөглөрөл болоод хөдөлгөөний удаашралыг барилга, засварын ажилтай холбон тайлбарлаж байна. Берлиний хувьд А-100 болон А-113 замууд дээр засвар явагдсан нь үүнд нөлөөлсөн байж болох юм. "Инрикс"-ийн судлаачид 2017 онд Германы 73 хот, суурин газруудад судалгаа явуулсан нь өмнөх жилийнхээс 11 хот, суурин газраар илүү байжээ. Түүнээс гадна бас нэгэн сонирхолтой зүйл ажиглагдсан нь нийслэл хотод машинуудын хурд дунджаар 8км/цагаар буурсан байна. Бөглөрөл хүмүүсийн уурыг хүргэхээр гадна их хэмжээний зардал учруулж байдаг. Берлинчүүд өнгөрсөн жил 6,9тэрбум евро буюу хамгийн их мөнгийг бөглөрөлд зарцуулсан бол Хамбург хот 3,5тэрбум, Мюнхен хот 2,9 тэрбум еврог зарлагадсан байна.