“РОСНЕФТЬ”-ИЙН ТӨЛӨӨЛӨГЧИД МОНГОЛД ХЭЛЭЛЦЭЭР ХИЙЖ БАЙНА

Монгол улсын бензин шатахууны хэрэглээ үндсэндээ 100 хувь хойд хөршөөс хамааралтай. "Роснефть" гэсэн ганцхан кранттай, тэдний ааш аягаар шатахуны үнэ тодорхойлогддог гэхэд бараг хилсдэхгүй. Харин У.Хүрэлсүхийн Засгийн газар нефть боловсруулах үндэсний үйлдвэртэй болохоор шамдаж буй энэ цаг үеэр "Роснефть" Монголын шатахууны хангамжийн асуудлаар санал гаргаж буй гэх мэдээлэл бий. Монгол Улсын Ерөнхийлөгчийн Владивостокт айлчлах үеэр Ангарскийн нефтийн үйлдвэртэй холбоотой, тухайлбал тус үйлдвэрийн 49 хувийг худалдан авах санал тавьсан гэх мэдээлэл сүүлийн үеэс дуулдаж байгаа. Энэ мэтээр Монголын газрын тосны салбарт хойд хөршийн зүгээс үе үе санаачлага гаргаж, амбицаа илэрхийлсээр иржээ. "Роснефть"-ийн төлөөлөгчид 2018 оны нэгдүгээр сарын 29-ний өдөр Монголд ирнэ гэсэн товтой байсан. Гэвч энэ хугацаа цөөн хоногоор хойшилж, өнгөрөгч долоо хоногт Монголд иржээ. Эдүгээ хоёр талын хооронд яриа хэлэлцээр үргэлжилж байгаа бөгөөд харин чухам ямар асуудлаар хэрхэн тохиролцож байгаа нь тодорхойгүй байгаа юм. Зарим эх сурвалжийн мэдээлж буйгаар ОХУ-ын "Роснефть" компани Монгол Улсад салбараа нээж магадгүй хэмээж байгаа юм. Учир нь тус компани энэ талаар урьд нь хоёр ч удаа хүсэлтээ илэрхийлж байсан гэх мэдээлэл байдаг.