ИТАЛИЙН УЛС ТӨРЧИД ЦАГААЧЛАЛД АНХААРЛАА ХАНДУУЛНА ГЭЖ АМАЛЖ БАЙНА

Итали улсын Макерата хотод арьс өнгөөр ялгаварлан гадуурхсан халдлага гарсны дараа цагаачлалын асуудал парламентын сонгуульд өрсөлдөгчдийн гол сэдэв болоод байна. Экс ерөнхий сайд "Форза Италиа" намын тэргүүн Силвия Берлускони цагаач иргэдийг "нийгэм дахь хэзээ ч дэлбэрч болзошгүй бөмбөг" гэж нэрлэсэн байна. Тэрээр мөн "Зүүний намыг засгийн эрх барьж байх хугацаанд 600 гаруй мянган дүрвэгч хууль бусаар Итали улсад ирсэн. Тэд гэмт хэрэг үйлдэхэд бэлэн хүмүүс" гэж нэгэн телевизэд өгсөн ярилцлагадаа хэлсэн байна. Бямба гарагт тус улсын Макерата хотод нэгэн эрэгтэй машин дотроосоо гадаадын хар арьст зургаан иргэнийг буудаж шархдуулсан хэрэг гарсан билээ. Тус улсын ерөнхий сайд Марко Миннити уг хэргийг арьс өнгөөр ялгаварлах үзэл гэж хэлсэн бол баривчлагдсан сэжигтний гэрээс мөрдөгчид Адольф Гитлерийн бичсэн "Миний тэмцэл" ном олдсон байна. Силвио Берлускони уг хэргийг "санаанд багтамгүй", "өвчтэй хүн л ийм зүйл хийж чадна. Энийг би ямар нэг улс төрийн бодлого гэж харахгүй байна. учир нь улс төр ийм галзууралд хүргэдэггүй" гэж хэлсэн байна. Тэрээр энэ удаагийн парламентын сонгуульд барууныг баримтлагч "Лега Норд" намтай эвсэл байгуулан оролцож байгаа юм. Тэгвэл Макерата хотод аймшигт хэрэг үйлдсэн иргэн өнгөрсөн жил "Лега Норд" намаас орон нутгийн сонгуульд нэр дэвшиж байжээ. Тус намын тэргүүн Маттео Салвини өөрийн Твиттер цахим хуудсанд "хяналтгүй цагаачлал нь эмх замбараагүй байдал, уур бухимдал болон нийгмийн мөргөлдөөнийг үүсгэ байна" гэж бичсэн байна. Олон нийтийн дунд явуулсан судалгаанаас харахад барууныг баримтлагч Берлускони, Салвини нар зүүний популист "Чинкүэ Стеллэ" намын Луижи Ди Майотой өрсөлдөх нь тодорхой байна.