ПАРИСТ БОЛСОН ХАЛДЛАГЫН ХЭРЭГТНИЙГ ШҮҮХ ХУРАЛ БРЮССЕЛЬД ЭХЭЛЛЭЭ

Брюссел болон Парист 2015, 2016 онуудад халдлага үйлдсэн этгээдүүдийн нэг болох Салах Абдесламыг шүүх хурал эхэллээ. Брюссел хотод болж байгаа энэ удаагийн шүүх хурал нь Францын иргэн, 28 настай сэжигтнийг бусадтай хамтран үйлдсэн халдлагын хэргээр бус цагдаагийн ажилтнуудын эсрэг гал нээж буудалцсан хэргээр шүүх юм. Парис хотод 2015онд болсон халдлагын дараа Абдесламыг Бельги рүү зугтсан болохыг илрүүлэн 2016оны 3-р сард цагдаа нар баривчилсан байна. Нэгэн тусгай ажиллагааны үеэр Абдеслам цагдаа нар руу гал нээн зугтсан боловч гурав хоногийн дараа баривчлагдсан юм. Шүүх хурал болж байгаатай холбоотойгоор Францын хойд хэсэгт байдаг хорих газраас өдөр бүр 140км тээвэрлэн шүүх хуралд оролцуулахаар болжээ. Абдесламыг мөн цагдаагийн ажилтны амь насанд халдахыг завдсан хэргээр Тунисийн иргэн СоуфинАяаригийн хамтаар буруутгаж байна. Шүүх хурал хэд хэдэн удаа хойшлогдож байсан бөгөөд өмгөөлөгчид шүүх хуралд бэлдэх хугацаа шаардлагатай гэсэн хүсэлт гаргавал дахин хойшлогдох магадлалтай гэж ажиглагчид үзэж байна.