УИХ-ЫН ГИШҮҮД ШАТРААР ӨРСӨЛДӨЖ БАЙНА

УИХ-ын гишүүдийн дунд уламжлал болгон зохион байгуулж буй "Цэцэн түшээ-2" шатрын тэмцээн өнөөдөр Төрийн ордонд болж байна.

Тэмцээнийг нээж УИХ-ын гишүүн, Улсын Их Хурал дахь Шатрын спортыг дэмжих лобби бүлгийн ахлагч Л.Оюун-Эрдэнэ хэлсэн үгэндээ "Шатрыг стратегийн, оюуны спорт гэж дэлхий дахинд үздэг. Манай бүлэг нэг жилийн хугацаанд шатрын спортыг хөгжүүлэх, ялангуяа өсвөрийн шатарчдыг дэмжиж, ирээдүйн их мастеруудыг бэлтгэн гаргахын төлөө багагүй зүйл хийлээ. Миний хувьд насанд хүрэгчдийн шатрын Улсын аварга шалгаруулах тэмцээнийг Хэнтий аймагт зохион байгуулахад дэмжиж ажилласан бол Улсын Их Хурлын гишүүн Б.Саранчимэгийн санаачлага, дэмжлэгтэйгээр өсвөрийн шатарчдын дунд "Ногоон бэрс" тэмцээн зохиогдсон. Харин Улсын Их Хурлын гишүүн Г.Тэмүүлэнгийн дэмжлэгтэйгээр Улсын аварга шалгаруулах шатрын тэмцээнийг энэ жил Архангай аймагт зохион байгуулах гэж байна.

Энэ онд бидний хийх нэг чухал ажил бол Шатрын ордноо барьж эхлүүлэх явдал юм. Судлаад үзэхэд Казахстан, ОХУ, АБНЭУ, Катар, ОХУ-ын Халимаг гээд олон газар шатрын ордон байгуулж, оюуны спортыг төрийн бодлогынхоо цөмд байлган, ирээдүйн шатарчдаа дэмждэг юм байна. Бид ч ийм зорилготой ажиллаж байгаа" гэдгийг онцлов.

Тэмцээнд зөвхөн УИХ-ын гишүүд оролцох бөгөөд швейцарь системээр зургаан өрөг тоглох юм. Хоёр дахь жилдээ зорхиогдож буй энэ удаагийн тэмцээнд УИХ-ын гишүүн Ц.Нямдорж, Д.Лүндээжанцан, Х.Болорчулуун, Г.Занданшатар, Ё.Баатарбилэг, Б.Саранчимэг, А.Сүхбат, Г.Тэмүүлэн, Л.Энхболд, Ө.Энхтүвшин нарын зэрэг гишүүд ур ухаанаа сорьж байна.

Тэмцээн үргэлжилж, одоогоор гурав дахь өрөг эхлээд байна гэж Улсын Их Хурлын Хэвлэл мэдээлэл, олон нийттэй харилцах хэлтэс мэдээлэв.