Д.СУМЪЯАБАЗАР САЙД “РОСНЕФТЬ” КОМПАНИТАЙ ХЭЛЭЛЦЭЭР ХИЙЖ БАЙНА

Өнгөрсөн долоо хоногийн лхагва гаригаас Уул уурхай, хүнд үйлдвэрийн сайд Д.Сумъяабазар "Роснефть"-ийн төлөөлөгчидтэй хэлэлцээр хийж эхэлсэн байна. Энэ талаар Д.Сумъяабазар сайд хэлэхдээ "Хэлэлцээр үргэлжилж байгаа. Хоёр тал байр сууриа нэгтгэсний дагуу албан ёсоор мэдээлэл хийнэ. Хэлэлцээрийн явцад мэдээлэл өгөх боломжгүй" гэсэн хариулт өгөв.

ОХУ-ын төрийн өмчит "Роснефть" компанийн хувьд өмнө нь манай улсад хоёр удаа салбараа нээх хүсэлтээ илэрхийлжээ. Улмаар хайгуул хийх асуудлаар хүсэлтээ илэрхийлж байсан гэх мэдээлэл ч байдаг. Гэвч албан ёсоор ажил хэрэг бололгүй өнөөг хүрсэн юм.

Шинэ он гарснаас хойш шатахууны зохиомол хомсдол үүсэх үеэр "Роснефть" Монголд салбараа нээх хүсэлт тавьсан гэх мэдээлэл түгсэн. Уг мэдээллийг Уул уурхай, хүнд үйлдвэрийн яам болон "Роснефть Монголиа" компанийн зүгээс үгүйсгэж, албан ёсоор хүсэлтээ илэрхийлээгүй гэдгийг тодотгосон юм.