ОХУ-ЫН БАЙЛДААНЫ ОНГОЦ АНУ-ЫН ОНГОЦЫГ АЮУЛД ОРУУЛСАН УУ?

ОХУ-ын "Су27" загварын байлдааны онгоц Хар тэнгисийн дээгүүр нисч явсанАНУ-ын онгоцонд 1,5м хүртэл ойртсон байна. АНУ-ын батлан хамгаалах яам Оросын байлдааны онгоцны энэ үйлдлийг хууль бус, аюултай үйлдэл мөн олон улсын гэрээ болон эрхийг зөрчсөн гэж мэдэгдэж байна. Тэгвэл ОХУ-ын зүгээс өөрийн байлдааны онгоцнуудыг олон улсын журмын дагуу, ямар ч хууль зөрчөөгүй гэсэн тайлбарыг хийгээд байгаа юм. Батлан хамгаалах яамны гаргасан тайлбарт "Оросын агаарын хилд үл мэдэгдэх нисдэг биет ойртсон. Уг биетийг тодруулахын тулд "Су27" онгоцыг илгээснээс гадна уг онгоц Америкийн онгоцноос хангалттай хол зайтай байсан. Уг нисдэг биет нь "Ариес2" загварын Америкийн эргүүлийн онгоц гэдгийг тогтоосон. Уг онгоц чиглэлээ өөрчлөн Оросын агаарын хилээс холдсоны дараа "Су27" онгоц бааздаа эргэн ирсэн" гэж дурьдсан талаар РИА хэвлэл мэдээллийн байгууллага мэдээллээ. Хар тэнгисийн агаарын оронзайд хийгдэж байгаа нислэгүүдээс болж АНУ, ОХУ-уудын дунд багагүй маргаан дэгддэг билээ. Орос улс Крымын хойгийг 2014онд өөртөө нэгтгэснээс хойш энэ бүсэд өөрийн армийн хүчийг нэмсэнтэй холбоотойгоор АНУ,НАТО-ийн зэвсэгт хүчин ч мөн үйл ажиллагаагаа явуулж байна.