ХИЛЭЭР ГАРГАХЫГ ЗАВДСАН 500 САЯ ТӨГРӨГИЙН АЛТЫГ МОНГОЛ БАНКИНД ШИЛЖҮҮЛЭХЭЭР БОЛЖЭЭ

Монгол улсын иргэд хилээр их хэмжээний алт нуун далдалж гаргаж байгаад баригдсан хэрэг өнгөрсөн 2017 оны дөрөвдүгээр сард гарчээ. Тодруулбал нэг гэр бүлийн хүмүүс болох Н,М нар нь тухайн өдөр Улаанбаатар-Эрээн чиглэлийн олон улсын суудлын галт тэргээр зорчиж явахдаа хуульд заасны дагуу хязгаарлалт тогтоосон бараа болох 5,286.4 грамм алтыг Монгол Улсын хилээр хууль бусаар нэвтрүүлсэн гэмт хэргийг үйлдсэн бөгөөд үйлдэл дээрээ баригдсан байна.

Эрүүгийн хуулийн тусгай ангийн 18.5 дугаар зүйлийн 1 дэх хэсэгт заасан "Хуулиар хязгаарлалт тогтоосон барааг Монгол Улсын хилээр хууль бусаар нэвтрүүлэх"-ийг хориглоно хэмээн заасан билээ.

Дорноговь аймгийн Замын-Үүд сум дахь сум дундын шүүх Н, М нарыг бүлэглэж, Эрүүгийн хуулийн тусгай ангийн 18.5 дугаар зүйлийн 1 дэх хэсэгт заасан хуулийн дагуу хязгаарлалт тогтоосон барааг Монгол Улсын хилээр хууль бусаар нэвтрүүлсэн гэмт хэргийг үйлдсэн гэм буруутайд тус тус тооцож, тус бүрийг хоёр мянга таван зуун нэгжтэй тэнцэх хэмжээний буюу 2,500,000 төгрөгийн торгох ял шийтгэжээ. Мөн Эрүүгийн хуулийн ерөнхий ангийн 21.5 дугаар зүйлийн 1 дэх хэсгийн 1.3-т зааснаар энэ хэрэгт эд мөрийн баримтаар хураагдсан 467,540,602 төгрөгийн үнэ бүхий 5 кг 286,40 грамм алтыг худалдан борлуулж улсын орлого болгохоор Монгол банкинд шилжүүлэхээр шийдвэрлэжээ. Давж заалдах шатны шүүхээс ч мөн адил дээрх шийдвэрийг хэвээр үлдээсэн байх юм.

Харин шүүгдэгчид таван хүүхэдтэй учраас торгуулийн таван сая төгрөг ахадсан мөнгө гэснээс гадна 5 кг 286,40 грамм алтыг улсын орлого болгох ёсгүй хэмээн үзэж Дээд шүүхэд ханджээ. Гэвч Дээд шүүх тэдний хүсэлтийг хэрэгсэхгүй болгож, анхан болон давж заалдах шатны шүүхийн тогтоолыг хэвээр үлдээж шийдвэрлэсэн байна.